ⵉⵙⵎⴰⵏ ⵓⵎⵎⴰⵙ ⴰⴷ ⵉⵙⵙⴰⵔⵓⵏ ⵏ 6,5 ⴰⵎⵍⵢⵓⵏ ⵏ ⴷⴷⵔⵀⵎ, ⴷ ⵉⵔⵡⴰⵙ ⵉⵎⵎⴰⵙⵏ ⵏ ⵜⵙⵏⵉⵊⵊⵉⵜ ⵏ ⵜⵙⵏⴳⴰⴹⵜ ⵍⵍⵉ ⵢⴰⴷ ⵜⵙⴽⵔ ⵜⵎⵔⵙⵍⵜ ⴳ ⴹⴹⴰⵕⵍⴱⵉⴹⴰ ⴷ ⵕⵕⴱⴰⵟ ⴷ ⵡⵊⴷⴰ ⴷ ⵏⵏⴰⴹⵓⵕ ⴷ ⵎⵕⵕⴰⴽⵯⵛ ⴷ ⵜⵉⵟⵡⴰⵏ ⴷ ⵟⴰⵏⵊⴰ ⴷ ⴼⴰⵙ ⴷ ⴰⴳⴰⴷⵉⵔ.
ⵔⴰⴷ ⵉⴼⴽ ⵓⵎⵎⴰⵙ ⵏ ⵜⵙⵏⵉⵊⵊⵉⵜ ⵏ ⵜⵙⵏⴳⴰⴹⵜ ⴳ ⵜⵓⴷⴷⵓⵔⵜ ⵏ ⵙⵉⴷⵉ ⵎⵓⵎⵏ ⵜⵉⴳⴰⵡⵏ ⵏ ⵓⵙⴼⵔⴽ ⴷ ⵏ ⵓⵔⴰⵢ ⴰⴼⴰⴷ ⴱⵉⴷⴷⵏ ⴰⵙⵎⵔⵙ ⵏ ⵉⵙⴷⵓⵀⴷⵓⵜⵏ, ⴷ ⵔⴰⴷ ⵜⴰⵡⵉ ⵜⴰⵎⵓⵏⵜ ⴰⴽⴷ ⵜⴰⵎⵙⵏⵉⵊⵊⵉⵜ ⴷ ⵜⴰⵏⴰⵎⵓⵏⵜ ⵏ ⵓⴼⴳⴰⵏ ⵍⵍⵉ ⴷⴰⵔⵜⵏ ⵉⵍⵍⴰⵏ ⵜⵉⵎⵙⴽⵔⵜ ⵏ ⵓⵏⴳⴰⴹ, ⴷ ⵔⴰⴷ ⵉⵙⴽⵔ ⵎⴰⴷ ⵉⵅⵚⵚⴰⵏ ⴰⴼⴰⴷ ⴽⵛⵎⵏⵜ ⵜⵉⵡⴰⵛⵓⵏⵏ ⴳ ⵜⵉⴳⴰⵡⵉⵏ ⵏ ⵓⵔⴰⵢ.
ⴼ ⵖⵉⴽⴰⵏⵏ, ⵉⵟⵟⴰⴼ ⵓⵎⵎⴰⵙ ⴰⵎⴰⵢⵏⵓ ⵢⴰⴷ ⵢⴰⵏ ⴰⴳⵊⴷⵉ ⵏ ⵜⵎⵓⵏⵜ ⴰⴽⴷ ⵜⴰⵏⴰⵎⵓⵏⵜ ⴷ ⵏ ⵓⵣⵓⴳⵣ ⵏ ⵡⴰⵜⵉⴳ ⵎⴰⵢⴰⴷ ⵉⵙⵏⵓⴱⴳⵏ ⵢⴰⵏ ⴰⵙⴰⵢⵔⴰⵔ ⵏ ⵓⵙⴳⵓⵏⴼⵓ, ⴷ ⵜⵉⴷⴰⵍⵉⵏ ⵏ ⵜⵡⵏⵏⵉⵜ ⵜⴰⵏⴼⴳⴰⵏⵜ ⴷ ⵜⴰⵏⴰⵥⵓⵕⵜ, ⴷ ⵏ ⵜⵓⵏⵏⵓⵏⵜ, ⴷ ⵏ ⵜⵙⵏⵎⴰⵍⴰⵢⵜ, ⴷ ⵢⴰⵏ ⴰⵙⵉⵔⴰ ⵏ ⵜⵉⵎⵙⵎⵓⵏⵏ.
ⵉⵍⵍⴰ ⴳ ⵓⴳⵊⴷⵉ ⵢⴰⴷ ⵢⴰⵏ ⴰⵙⵉⵔⴰ ⵏ ⵓⴳⵣⵣⵓⵎ ⵉⵜⵜⵎⵓⵜⵜⵓⵢⵏ ⵍⵍⵉ ⵔⴰⴷ ⵉⴼⴽ ⵜⵉⵏⴰⴼⵓⵜⵉⵏ ⵏ ⵓⴽⵎⵓⵔ ⴷⴰⵔ ⵉⵎⴷⵉⵀⴷⵉⵏ, ⵜⵉⵙⵎⵉⴳⵍⵏ ⵏ ⵓⵎⵎⴰⵥ ⵏ ⴰⵡⴰⴹ, ⴷ ⵏ ⵓⵏⵖⵎⵉⵙ, ⴷ ⵏ ⵓⵙⴼⵔⴽ ⵏ ⵉⵎⵉⵣⵉⵏ, ⴷ ⵎⵏⵏⴰⵡ ⵏ ⵜⵉⵏⴰⴼⵓⵜⵉⵏ ⵢⴰⴹⵏⵉⵏ.
ⵜⵓⵚⴽⵉⵡⵜ ⵜⴰⵎⴰⵢⵏⵓⵜ ⴰⴷ, ⵍⵍⵉ ⵢⴳⴰⵏ ⵢⴰⵏ ⴰⵙⵖⵉⵡⵙ ⴰⵏⴰⵎⵓⵏ ⴰⵎⵙⵏⵉⵊⵊⵉ ⴰⴽⵎⵓⵔ ⴳ ⵜⵙⴳⴰ ⵏ ⴹⴹⴰⵕⵍⴱⵉⴹⴰ ⵚⵟⵟⴰⵜ (2016-2020), ⵜⵙⵏⵓⴱⴳ ⵙⵓⵍ ⵢⴰⵏ ⵓⴳⵊⴷⵉ ⴰⵎⵙⵏⵉⵊⵊⵉ ⵍⵍⵉ ⴳⵉⵜ ⵉⵍⵍⴰⵏ ⵜⵉⴷⴰⵍⵉⵏ ⵏ ⵉⵊⵉⵊⵊⵉⵜⵏ, ⴷ ⵓⵣⵣⵔⴰⵢ ⴳ ⵜⵙⵏⵉⵊⵊⵉⵜ ⵜⴰⵎⴰⵜⴰⵢⵜ, ⴷ ⵜⴰⵙⵏⴳⴰⴹⵜ, ⴷ ⵜⴰⵙⵏⵉⵊⵊⵉⵜ ⵜⴰⵏⵢⵉⵎⴰⵏⵜ, ⴷ ⵢⴰⵜ ⵜⴰⵙⴰⵙⴼⵔⵜⵏ, ⴷ ⵎⵏⵏⴰⵡ ⵏ ⵜⵉⴷⴰⵍⵉⵏ ⵢⴰⴹⵏⵉⵏ.