ⴳ ⵜⴱⵔⴰⵜ ⴰⴷ, ⵍⵍⵉ ⵢⵖⵕⴰ ⵡⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ, ⵉⵙⵙⴽⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵍⵉⵖ ⵉⵜⵜⵓⵙⵜⴰ, ⴳ ⵜⵇⵉⵛⵛⵉⵜ ⵜⵉⵙⵙ 28, ⴰⴷ ⵉⴳ "ⴰⵏⵙⵙⵉⵅⴼ ⵏ ⵜⵎⵓⵏⵜ ⵜⵉⴼⵔⵉⵇⵉⵜ ⴳ ⵜⵎⵙⴰⵔⵜ ⵏ ⵜⵣⵡⴰⴳⵜ". ⴷⴼⴼⵉⵔ ⵏ ⵖⵉⴽⴰⵏⵏ, ⵉⵎⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴳ ⵢⵓⵍⵢⵓⵣ 2017, ⵢⴰⵏ ⴰⵣⵎⵎⴻⵎ ⴰⵎⵏⵣⵓ ⵉ ⵎⴰⵙⵙ ⴰⵍⴼⴰ ⴽⵓⵏⴷⵉ.
"ⴳ ⴰⵙⵙ ⴰⴷ, ⵔⴰⴷ ⴽⵯⵏ ⴼⴽⵖ ⵢⴰⵜ ⵜⵏⵜⴰⵎⵜ ⵍⵍⵉ ⵢⴳⴰⵏ "ⵜⴰⵎⵙⵙⴽⵜⵉⵜ ⵜⴰⴼⵔⵉⵇⵉⵜ ⵅⴼ ⵜⵣⵡⴰⴳⵜ", ⵍⵍⵉ ⵉⴹⴼⴰⵕⵏ ⵢⴰⵜ ⵜⴰⵎⵢⴰⴷⴰⵙⵜ ⵜⴰⵏⵙⵏⴽⵛⴰⵎⵜ ⴷ ⵏ ⵜⴷⵔⴰⵡⵜ", ⵎⴰⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵜⵓⵛⴽⴰ ⵜⵎⵙⵙⴽⵜⵉⵜ ⴰⴷ ⴷⴼⴼⵉⵔ ⵏ ⵙⵏⴰⵜ ⵏ ⵜⵙⵎⵓⵏⵉⵏ ⵉⴷⴷⵓⵔⵏ, ⵎⴰⵢⴰⴷ ⵉⴳⴰⵏ ⵜⴰⵙⵎⵓⵏⵉ ⵜⴰⵏⵎⵏⴰⴹⵜ ⵏ 2 ⵏⵓⵡⴰⵏⴱⵉⵔ 2017 ⴳ ⵚⵚⵅⵉⵕⴰⵜ ⴷ ⵜⵉⵏⴰⵡⵜ ⵜⴰⵎⴰⵡⵙⴰⵙⵜ ⵉⵜⵜⵓⵙⴽⴰⵔⵏ ⴳ ⵕⵕⴱⴰⵟ ⴳ 9 ⵉⵏⵏⴰⵢⵔ 2018.
ⵜⵎⵍⴰ ⵜⵎⵙⵙⴽⵜⵉⵜ ⵉⵙ ⵓⵔ ⵜⵍⵍⵉ ⴽⵔⴰ ⵢⴳⴰⵜ ⵜⴹⴹⴰⵏⴳⴰ ⵏ ⵉⵎⵣⵡⴰⴳⵏ, ⴰⵛⴽⵓ ⵓⵔ ⴳⵉⵏ ⵉⵎⵣⵡⴰⴳⵏ ⴰⴷ ⴰⴱⵍⴰ 3,4% ⵙⴳ ⵉⵎⵣⴷⴰⵖⵏ ⵉⵎⴰⴹⵍⴰⵏ. ⵜⵎⵍⴰ ⵙⵓⵍ ⵜⵎⵙⵙⴽⵜⵉⵜ ⴰⴷ ⵉⵙ ⵜⵊⵕⴰ ⵜⵣⵡⴰⴳⵜ ⵜⴰⴼⵔⵉⵇⵉⵜ ⴳ ⵓⴳⵏⵙ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ, ⴰⵛⴽⵓ 4 ⵏ ⵉⵎⵣⵡⴰⴳⵏ ⵉⴼⵔⵉⵇⵉⵏ ⴰⵎⵎⴰⵙ ⵏ 5 ⴰⵔ ⵇⵇⴰⵎⴰⵏ ⴳ ⵓⵎⵏⵥⴰⵡ. ⴰⵎⵎⴰ ⴱⵕⵕⴰ ⵏ ⵉⴼⵔⵉⵇⵢⴰ, ⵓⵔ ⵜⴳⵉ ⵜⵣⵡⴰⴳⵜ ⴰⴱⵍⴰ 14% ⵙⴳ ⵉⵎⵣⴷⴰⵖⵏ ⵉⵎⴰⴹⵍⴰⵏ, ⵎⴰⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵙ ⵓⵔ ⴰⵖ ⵜⵥⵍⴰⴹ ⵜⵣⵡⴰⴳⵜ ⵏ ⵜⵎⵉⵣⴰⵔ ⵏ ⵓⵙⵏⵓⴱⴱⴳ, ⴰⵛⴽⵓ 85% ⵏ ⵎⴰⴷ ⵙⵙⴽⵛⴰⵎⵏ ⵉⵎⵣⵡⴰⴳⵏ ⴰⵔ ⵉⵇⵇⵓⵎⵓ ⴳ ⵜⵎⵉⵣⴰⵔ ⴰⴷ.
ⴼ ⵖⵉⴽⴰⵏⵏ, ⵜⵔⴰ ⵜⵎⵙⵙⴽⵜⵉⵜ ⴰⴷ ⵜⵙⴽⵔ ⴰⵙⴰⴹⴰⴼ ⴰⴼⵔⵉⵇⵉ ⵏ ⵜⵣⵡⴰⴳⵜ, ⴷ ⵜⴰⵙⵎⵉⴳⵍⵜ ⵏ ⵓⵎⴰⵣⴰⵏ ⵉⵎⵥⵍⵉ ⵏ ⵜⵎⵓⵏⵜ ⵜⵉⴼⵔⵉⵇⵉⵜ ⵉⵜⵜⵓⵙⵎⴰⴳⵍⵏ ⵙ ⵜⵣⵡⴰⴳⵜ.
ⵍⵎⵖⵔⵉⴱ, ⵍⵍⵉ ⵔⴰⴷ ⵉⵙⵏⵓⴱⴳ ⵢⴰⵜ ⵜⵉⵏⴰⵡⵜ ⴳⵔ ⵏ ⵜⵏⴱⴰⴹⵉⵏ ⵏ ⵜⵓⵎⴰⵣ ⵏ ⵓⵎⵉⵔⵓ ⴰⵎⴰⴹⵍⴰⵏ, ⵓⵍⴰ ⴰⴳⵔⴰⵡ ⴰⵖⵣⵓⵔⴰⵏ ⵏ ⵜⵣⵡⴰⴳⵜ ⴷ ⵜⴳⵎⵉ ⴳ ⴷⵓⵊⴰⵏⴱⵉⵔ 2018, ⵉⵙⵙⵓⵖⵏ ⴰⴷ ⵢⴰⵊⵊ ⵉⵎⴰⴳⵔⵏ ⴰⴷ ⴰⴷ ⴳⵉⵏ ⵢⴰⵜ ⵜⴷⴰⴱⵓⵜ ⵏ ⵉⴼⵔⵉⵇⵢⴰ.
ⵙⴳ 2015, ⵓⴳⴳⴰⵔ ⵏ 6200 ⵏ ⵜⵎⵣⵣⵉⵜⵉⵏ ⴰⴷ ⵉⵎⵎⵓⵜⵉⵏ ⴳ ⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ, ⵎⴰⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ. ⴰⴼⴰⴷ ⵓⵔ ⴷⴷⵓⵏ ⵜⵉⵎⵟⵓⵟⵟⵉⵏ ⴷ ⵉⵡⴰⵛⵓⵏ ⴳ ⵉⵔⴳⴰⵣⵏ ⵉⵎⵎⵓⵜⵏ ⴳ ⵍⴰⵎⴱⵉⴷⵓⵙⴰ ⵅⴼ ⵡⴰⵍⵓ, ⴷ ⵅⴼ ⵜⵉⵎⵙⴽⵔⵜⵏ ⵉⵅⵛⵏⵏ ⴳ ⵍⵉⴱⵢⴰ, ⵉⵅⵚⵚⴰ ⴰⴷ ⵏⵙⴽⵔ ⴽⵔⴰ, ⵎⴰⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⵙ ⵡⵉⵙⵙ ⵚⴹⵉⵚ.