ⵢⵓⵛⴽⴰ ⴷ ⵓⵙⵉⵡⵍ ⵅⴼ ⵡⴰⴷⴷⴰⴷ ⴰⴷ ⴳ ⵢⴰⵏ ⵓⵙⵎⵎⴰⵍ ⵏ ⵜⵏⴰⵡⴰⵙⵜ ⵏ ⴱⵕⵕⴰ ⵜⴰⵊⴰⴱⵓⵏⵉⵜ ⵉⴼⴼⵖ ⴷ ⵜⵉⵣⵉ ⵏ ⵓⵏⵎⵓⵇⵇⴰⵔ ⵉⵙⵎⵓⵏ ⵉⴹⴳⴰⵎ ⵏ ⵓⵙⵉⵏⴰⵙ ⴳ ⵍⵇⴰⵀⵉⵕⴰ, ⴰⵏⵙⵙⵉⵅⴼ ⵏ ⵜⴷⵓⴱⵍⵓⵎⴰⵙⵉⵜ ⵜⴰⵊⴰⴱⵓⵏⵉⵜ, ⵀⴰⵢⴰⵛⵉ ⵢⵓⵛⵉⵎⴰⵙⴰ, ⵙ ⵉⴽⵏⵉ ⵏⵏⵙ ⴰⵎⵖⵔⴰⴱⵉ ⵏⴰⵚⵉⵕ ⴱⵓⵕⵉⵟⴰ, ⴳ ⵓⵙⴰⵜⵉ ⵏ ⵜⵉⵍⴰⵍ ⵏ ⵓⵙⵇⵇⵉⵎ ⵏ ⵜⵙⴷⴰⵡⵉⵜ ⵏ ⵉⵡⴰⵏⴽⵏ ⴰⵄⵕⴰⴱⵏ ⴳ ⵓⵙⵡⵉⵔ ⵏ ⵉⵎⴰⵡⴰⵙⵏ ⵏ ⵉⵙⴽⴽⵉⵏⵏ ⵏ ⴱⵕⵕⴰ.
ⵜⵏⵏⴰ ⵜⵎⴰⵡⴰⵙⵜ ⵏ ⵉⵙⴽⴽⵉⵏⵏ ⵏ ⴱⵕⵕⴰ ⵜⴰⵊⴰⴱⵓⵏⵉⵜ, ⴳ ⵓⵙⵎⵎⴰⵍ ⴰⵏⵏ ⵏⵉⵜ, ⵎⴰⵙ ⴷ "ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵜ ⵏ ⵜⵏⵣⵔⵓⴼⵜ, ⵉⵙⴱⵔⵔⴽ ⵓⵎⴰⵡⵙⴰⵙ ⵏ ⵉⵙⴽⴽⵉⵏⵏ ⵏ ⴱⵕⵕⴰ, ⵀⴰⵢⴰⵛⵉ ⵢⵓⵛⵉⵎⴰⵙⴰ, ⵙ ⵜⵓⴳⴳⴰⵙ ⵏ ⵍⵎⵖⵔⵉⴱ ⵜⵉⴷⵖⵔⵉⵢⵉⵏ ⴷ ⵖⵓⵔ ⵜⴰⵎⵙⵙⴳⵍⵉⵜ ⵃⵎⴰ ⴰⴷ ⵜⴷⴷⵓ ⵜⵎⴳⴳⵉⵜ ⵜⴰⵙⵔⵜⴰⵏⵜ ⵙ ⴷⴰⵜ.
ⵎⴽⵍⵍⵉ ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⴷⵉⴱⵍⵓⵎⴰⵙⵉⵜ ⵜⴰⵊⴰⴱⵓⵏⵉⵜ ⵅⴼ ⵜⵉⵏⴷⵉ ⵏ ⵓⵖⴰⵡⴰⵙ ⵏ ⵓⵏⴱⴰⴹ ⴰⵏⵉⵎⴰⵏ ⵏⵏⴰ ⵉⵙⵙⵎⵏⵉⴷ ⵍⵎⵖⵔⵉⴱ, ⵉⵙⴰⵡⵍ ⵅⴼ ⵡⴰⵏⵏⴰⵍ ⵏⵏⵙ ⵉ ⵜⵓⴳⴳⴰⵙ ⵏ ⵜⵔⵇⵇⴰⵙⵜ ⵏⵏⴰ ⵏⵏ ⵉⵜⵜⴳⴳⴰ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⵉ ⵉⵎⵓⵏⵏ ⴷ ⵓⵎⴰⵣⴰⵏ ⵏⵏⵙ ⵓⴷⵎⴰⵡⴰⵏ ⵙ ⵜⵏⵣⵔⵓⴼⵜ.
ⴳ ⵜⵙⴳⴰ ⵢⴰⴹⵏ, ⵉⵙⴳⵎⴹ ⵎⴰⵙⵙ ⵀⴰⵢⴰⵛⵉ ⵙ ⵜⵣⴷⴰⵢⵉⵏ ⵜⵉⵎⵓⴼⴰⵢⵉⵏ ⴳⵔ ⵊⴰⴱⵓⵏ ⴷ ⵍⵎⵖⵔⵉⴱ ⵏⵏⴰ ⴱⴷⴷⴰ ⵉⴱⴷⴷⵏ ⵅⴼ ⵜⵉⵔⵙⵍⵜ ⵏ ⵉⵙⵖⵡⴰⵏ ⵏ ⵜⵉⴷⴷⵓⴽⵍⴰ ⵉⴷⵓⵙⵏ ⴳⵔ ⵜⵡⵊⴰ ⵜⴰⵎⵏⵓⴽⴷⴰ ⵜⴰⵊⴰⴱⵓⵏⵉⵜ ⴷ ⵜⵡⵊⴰ ⵜⴰⴳⵍⴷⴰⵏⵜ ⵜⴰⵎⵖⵔⴰⴱⵉⵜ.
ⵉⵙⵉⵡⵍ ⴳ ⵓⵎⵏⴰⴹ ⴰⴷ, ⵅⴼ ⵓⵏⵜⵓⵎ ⵏ ⵊⴰⴱⵓⵏ ⴳ ⵓⴹⴼⵓⵕ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⴰⴷ ⴳ ⵉⴳⵔⴰⵏ ⵉⵎⵏⵏⴰⵡⵏ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵜⵡⵓⵔⵉⵡⵉⵏ ⴷ ⵉⵙⵙⴰⵔⵓⵜⵏ.
ⴳ ⵜⵙⴳⴰ ⵏⵏⵙ, ⵉⵙⵙⵉⵎⵖⵓⵔ ⵎⴰⵙⵙ ⴱⵓⵕⵉⵟⴰ ⵙ ⵜⵣⴷⴰⵢⵉⵏ ⵏ ⵜⵉⴷⴷⵓⴽⵍⴰ ⵜⴰⵣⴰⵢⴽⵓⵜ ⴱⴷⴷⴰ ⵉⴱⴷⴷⵏⵏ ⴳⵔ ⵜⵎⵉⵣⴰⵔ ⴰⴷ, ⵉⵙⵉⵡⵍ ⵅⴼ ⵓⵃⵉⵢⵢⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵓⵙⴷⵔⵓ ⵏ ⵓⵎⵢⴰⵡⴰⵙ ⴳⵔ ⵜⵎⵉⵣⴰⵔ ⴰⴷ ⴳ ⵢⴰⵜ ⵜⴳⵔⵓⵎⴰ ⵜⴰⴱⴰⵔⴰⵡⵜ ⵏ ⵢⵉⴳⵔⴰⵏ, ⴳ ⵉⵍⵍⴰ ⵓⵙⵏⴼⵍ ⵏ ⵡⴰⵔⵣⴰⴼⵏ ⵎⵎⵉ ⵉⴷⵓⵙ ⵓⵙⵡⵉⵔ, ⴷ ⵜⵙⴱⴱⴰⴱⵜ ⴷ ⵓⵙⵙⴰⵔⵓ ⴷ ⵓⵍⴰ ⴰⵎⵙⴰⵡⴰⵍ ⴰⵙⵔⵜⴰⵏ.
ⴳ ⵜⵙⴳⴰ ⵢⴰⴹⵏ, ⵜⵙⴰⵡⵍ ⵜⵎⴰⵡⴰⵙⵜ ⵏ ⴱⵕⵕⴰ ⵜⴰⵊⴰⴱⵓⵏⵉⵜ ⵎⴰⵙ ⴷ ⵉⵎⴰⵡⵙⴰⵙⵏ ⴰⴷ ⵙⵏⴼⵍⵏ ⵉⵎⵏⴰⴷⵏ ⵏⵏⵙⵏ ⵙ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵜⵉⵎⴰⵍⵖⴰⴷⵉⵏ, ⴳ ⵉⵍⵍⴰ ⵡⴰⴷⴷⴰⴷ ⵏ ⴽⵓⵔⵢⴰ ⵏ ⵢⵉⵥⵥⵍⵎⴹ ⴷ ⵓⴽⵕⴰⵏⵢⴰ, ⵜⵔⵏⵓ ⵎⴰⵙ ⴷ ⵙⵉⵏ ⴰⴷ, ⵙⴷⴷⵉⴷⵏ ⴳ ⵓⵎⵏⴰⴹ ⴰⴷ, ⴰⵏⵜⵓⵎ ⵏⵏⵙⵏ ⴳ ⵜⵡⵓⵔⵉ ⵜⴰⵙⵉⵏⵔⴰⵏⵜ ⴳ ⵜⵎⵙⴰⵔⵉⵏ ⵉⵎⵣⴰⵔⴰⵢⵏ ⵉⵣⴷⵉⵏ ⴷ ⵡⴰⵎⵓⵏ ⴰⴳⵔⴰⵖⵍⴰⵏ.