ⵙ ⴰⵢⵍⵍⵉ ⴷ ⵢⵉⵡⵉ ⵓⵙⵉⵡⴹ ⵏ ⵜⵎⵙⵎⵓⵏⵜ ⵏ ⵜⵎⵉⵜⴰⵔ, ⵜⴰⵙⵓⵜⵍⵜ ⴰⴷ ⵏⵏⴰ ⴷⴰⵖ ⵉⵙⵎⴷⵢⴰⵏ ⵙⵉⵏ ⵉⵎⵏⴰⴷⵏ ⵉⴷⵍⵙⴰⵏⵏ, ⴷ ⴰⵔ ⴳⵉⵙ ⵙⴱⵔⵔⴰⴽⵏ ⵉⵏⴰⵥⵓⵕⵏ ⵉⵎⴰⵣⵉⵖⵏ ⵙ ⵓⵥⴰⵡⴰⵏ ⵏ ⵓⵎⴰⴹⴰⵍ, ⵖⵓⵔⵙ ⵜⵉⵏⴷⵉ ⵎⵇⵇⵓⵔⵏ ⴹⴰⵕⵜ ⵏ ⵜⵖⵜⴰⵙⵜ ⵜⴰⵎⵣⵔⴰⵢⵜ ⵏⵏⴰ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ, ⵙ ⵓⵙⵖⵜⵙ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⵏⵓⵕⵥⵎⵜ ⵜⴰⵏⴰⵎⵓⵔⵜ ⵜⴰⵎⴰⴷⴷⵓⴷⵜ.
ⵉⵔⵏⵓ ⵓⵖⴱⴰⵍⵓ, ⵎⴰⵙ ⴷ ⵉⵎⴰⵏ ⵏ ⵓⵏⵏⵓⵕⵥⵎ ⴳ ⵓⵏⵎⵓⴳⴳⴰⵔ ⵏ ⵜⵎⵉⵜⴰⵔ, ⵉⴷⵓⵙ ⵙ ⵓⵙⵖⵉⵡⵙ ⴰⵥⴰⵡⴰⵏ ⴷ ⵓⵥⵓⵕⴰⵏ ⵏⵏⴰ ⵔⴰⴷ ⵢⴰⵊⵊ ⵙⴳ ⵜⵉⵏⴷⵉⵜⵉⵏ ⵏ ⵓⵎⵙⵓⵔⵓⴼ ⴷ ⵜⵓⴷⵔⵜ ⵉⵛⵛⴰⵔⵏ ⴰⴼⵔⵉⵙ ⵏⵏⵙ, ⵓⵢⴰ ⴳ 21 ⵏ ⵜⴼⵓⴳⵍⴰ ⵜⴰⵥⴰⵡⴰⵏⵜ ⴳ ⵓⵙⴰⵢⵔⴰⵔ ⵏ ⵍⴰⵎⴰⵍ ⴷ ⵓⵎⵣⴳⵓⵏ ⵏ ⵓⵣⵡⵓ ⴰⵎⵏⵏⵓⵕⵥⵎ.
ⴳ ⵜⵉⵣⵉ ⵏ ⴽⵕⴰⴹ ⵏ ⵡⵓⵙⵙⴰⵏ, ⵔⴰⴷ ⴼⴽⵉⵏ 60 ⵏ ⵓⵏⴰⵥⵓⵕ ⵜⵉⴼⵔⴰⵙ ⵏ ⵜⵓⵎⵔⵜ ⴳ ⵉⵙⴳⵓⵏⴼⵓⵜⵏ ⵏ ⵓⴳⴷⵓⴷ ⵏ ⵓⴳⴰⴷⵉⵔ, ⵙⴳ ⵓⵎⵢⴰⵏⴰⵡ ⵏ ⵓⵥⴰⵡⴰⵏ ⵏⵏⴰ ⵉⵙⴼⵓⴳⵍⵓⵏ ⵙ ⵡⴰⵢⴷⴰ ⴰⵎⴰⵣⵉⵖ ⴷ ⵜⵥⵓⵕⵉ ⵜⴰⵎⵖⵔⴰⴱⵉⵜ ⵜⴰⵜⵔⴰⵔⵜ, ⴷ ⵡⴰⵏⵢⴰⵜⵏ ⵉⴼⵔⵉⵇⵉⵢⵏ ⴷ ⵉⴳⵎⵎⵓⴹⴰⵏⵏ ⴷ ⵓⵕⵓⴱⵉⵢⵏ ⵉⵎⵢⴰⵏⴰⵡⵏ, ⴰⴼⴰⴷ ⴰⴷ ⵉⵙⵙⵓⵏⵖ ⵓⵏⵎⵓⴳⴳⴰⵔ ⵜⴰⵎⴰⵜⴰⵔⵜ ⵏⵏⵙ ⵜⴰⵥⵓⵕⴰⵏⵜ ⵙⴳ ⵓⵎⵎⵔⴽⵙ ⵏ ⵉⴽⵯⵍⴰⵏ ⵉⵥⵓⵕⴰⵏⵏ ⵉⵥⴰⵡⴰⵏⵏ ⵉⵎⵢⴰⵏⴰⵡⵏ ⴷ ⵉⵎⵣⴰⵔⴰⵢⵏ ⴳ ⵓⵎⵙⴰⵡⴰⵍ ⴰⴷⵍⵙⴰⵏ ⵉⵎⵙⴰⵙⴰⵏ ⴳ ⵜⴰⴹⴹⴰⵏⴳⵉⵡⵉⵏ ⵏ ⵉⵖⵎⴱⵓⵜⵏ ⵉⵎⵃⵔⴳⵉⵜⵏ.
ⵙ ⵓⵙⵓⴼⵓ ⵏ ⵜⵎⴰⴳⵉⵜ ⵏⵏⵙ ⵉⵙⴳⴳⵯⴰⵙⵏ ⴰⵢⴰⴷ, ⵔⴰⴷ ⵕⵥⵎⵏ ⵉⵡⵉⵣⵏ ⵏ ⵓⵏⵎⵓⴳⴳⴰⵔ ⵙ ⵜⵥⵓⵕⵉ ⵏ ⵓⵃⵡⴰⵛ ⵙ ⵉⴽⵯⵍⴰⵏ ⵏⵏⵙ ⵉⵎⵢⴰⵏⴰⵡⵏ ⵏⵏⴰ ⵔⴰⴷ ⵉⵙⴼⴰⵍⴽⵉ ⴳ ⵎⴰⴷ ⵉⴳⴰⵏ ⴽⵕⴰⴹ ⵡⵓⵙⵙⴰⵏ ⵜⵉⵎⵙⵓⵍⵉⵏ ⵏ ⵓⵏⵎⵓⴳⴳⴰⵔ, ⵜⴰⵡⴰⵍⴰ ⴰⴷ ⴷⴰⵔⵙ ⴰⵏⵏⴰⵣ ⵏ ⵜⵉⵍⵉⵜ ⵉⵥⵍⵉⵏ ⵏ ⵜⵥⵓⵕⵉ ⵏ ⵕⵕⵡⴰⵢⵙ ⵉⵙⵎⴷⵢⴰⵏ ⵙ ⵜⴰⵕⵕⴰⵢⵙⵜ ⵄⴰⵢⵛⴰ ⵜⴰⵛⵉⵏⵡⵉⵜ, ⵕⵕⴰⵢⵙ ⵍⵃⵓⵙⴰⵢⵏ ⴰⵎⵕⵕⴰⴽⵛⵉ, ⵕⵕⴰⵢⵙ ⴰⵄⵕⴰⴱ ⴰⵜⵉⴳⴳⵉ, ⵙ ⵜⵎⵔⵏⵉⵡⵜ ⵏ ⵜⵔⵓⴱⴱⴰ ⵜⵉⵎⴰⵣⵉⵖⵉⵏ ⵏ ⵓⵏⴰⵥⵓⵕ ⵃⴰⵎⵉⴷ ⵉⵏⵔⵣⴰⴼ, ⴷ ⵓⵏⴰⵥⵓⵕ ⵍⵄⵕⴱⵉ ⵉⵎⵖⵔⴰⵏ.
ⵔⴰⴷ ⵉⵥⵕ ⵡⴰⵀⵉⵍ ⵏ ⵓⵏⵎⵓⴳⴳⴰⵔ ⵜⵉⵍⵉⵜ ⵉⴷⵓⵙⵏ ⵏ ⵓⵥⴰⵡⴰⵏ ⴰⵎⵖⵔⴰⴱⵉ ⴷ ⵓⵄⵕⴰⴱ ⴰⵜⵔⴰⵔ ⵙ ⵜⴷⵔⴰⵡⵜ ⵏ ⵉⵏⴰⵥⵓⵕⵏ ⵎⴰⵏⴰⵍ, ⵣⴰⴽⴰⵔⵢⴰ ⵍⵖⴰⴼⵓⵍⵉ, ⵉⵍⵢⴰⵙ ⴷⵉⵙⵜⴰⵏⴽⵜ, ⴰⵎⵉⵏ ⴱⴰⴱⵉⵍⵓⵏ ⴷ ⵜⵔⴰⴱⴱⵓⵜ ⵏ ⴰⴷⵓⵏⵉⵙ ⵜⴰⵍⵓⴱⵏⴰⵏⵉⵜ.
ⴷ ⴰⵔ ⵉⵙⵎⴷⵢⴰ ⵓⵥⴰⵡⴰⵏ ⵏ ⵜⵏⵣⵔⵓⴼⵜ ⵙ ⵉⵙⵉⵏⵔⴰⵏⵏ ⵉⵎⴰⵍⵉⵢⵏ ⴰⵎⴰⴹⵓ ⴷ ⵎⴰⵔⵢⴰⵎ, ⴷ ⵜⵔⴰⴱⴱⵓⵜ ⵜⴰⵔⵡⴰ ⵏ ⵜⵏⵉⵔⵉ ⴷ ⵢⵓⵛⴽⴰⵏ ⵣⵖ ⵡⴰⵔⵣⴰⵣⴰⵜ, ⴷ ⵜⵔⴰⴱⴱⵓⵜ "ⴱⴰⴱ ⴱⵍⵓⵣ" ⵜⴰⴼⵕⴰⵏⵙⵉⵙⵜ ⵜⴰⵎⵖⵔⴰⴱⵉⵜ ⵏⵏⴰ ⵉⵙⵙⵎⵔⴽⴰⵙⵏ ⴰⵥⴰⵡⴰⵏ ⴰⴳⵏⴰⵡⵉ ⴷ ⵓⵃⵙⵙⴰⵏⵉ ⴳ ⵢⴰⵏ ⵓⵙⵙⵓⵏⵛⴽ ⴰⵎⵥⴰⵡⴰⵏ ⴰⵍⴳⴳⵯⴰⵖ ⵉⵎⵙⴰⵙⴰⵏ, ⴷ ⵢⴰⵜ ⵖ ⵜⴰⵣⵎⵣⵉⵏ ⴷⵓⵙⵏⵉⵏ ⵏ ⵓⵏⵎⵓⴳⴳⴰⵔ ⴰⴷ, ⵓⵖⵓⵍ ⵏ ⵜⵏⴰⵥⵓⵕⵜ ⵏⴰⵊⵡⴰ ⴽⴰⵕⴰⵎ ⵜⵉⴽⴽⵍⵉⵜ ⵢⴰⴹⵏ, ⵙ ⵜⵎⵙⵓⵍⵜ ⵏ ⵜⵎⵉⵜⴰⵔ ⴰⴷ ⵜⵙⵎⵓⵔⴳ ⴰⴳⴷⵓⴷ ⵙ ⵓⵥⴰⵡⴰⵏ ⴰⵍⵓⴱⵏⴰⵏⵉ.
ⴰⴷ ⵉⵜⵜⵓⴱⴷⴰⵔ ⵎⴰⵙ ⴷ ⴰⵏⵎⵓⴳⴳⴰⵔ ⵏ ⵜⵎⵉⵜⴰⵔ, ⵏⵏⴰ ⵉⴳⴰⵏ ⵢⴰⵜ ⵜⴽⵜⵓⵜ ⵜⴰⵙⴳⵯⵙⴰⵏⵔ ⵉⵙⴼⴰⵍⴽⵉⵏ ⵉⵎⵥⵕⵉ ⴰⴷⵍⵙⴰⵏ ⵏ ⵜⵖⵔⵎⵜ ⵏ ⵓⴳⴰⴷⵉⵔ, ⴰⵔ ⵉⵜⵜⵏⵎⵉⵍⵉ ⵙ ⵜⴷⵔⴰⵡⵜ ⴷ ⵓⵙⵇⵇⵉⵎ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⵜ, ⵜⴰⴳⵔⴰⵡⵜ ⵜⴰⴽⴰⵍⴰⵏⵜ ⵏ ⵓⴳⴰⴷⵉⵔ, ⵡⵉⵍⴰⵢⴰ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⵜ, ⵜⴰⵎⵏⴱⴰⴹⵜ ⵏ ⵓⴳⴰⴷⵓⵔ ⵉⴷⴰⵡⵜⴰⵏⴰⵏ, ⴰⵙⵇⵇⵉⵎ ⴰⵏⵎⴰⴹ ⵏ ⵜⵎⴰⵍⵍⴰⵢⵜ, ⴷ ⵜⵎⵏⴰⴹⵉⵏ ⵉⵙⴷⵍⵏ ⴷ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ.