ⵉⵏⵏⴰ ⵍⴰⵜⵓⵕⵉ ⴳ ⵢⴰⵜ ⵜⵙⴳⵓⵔⵉ ⵉ ⵜⵙⵏⵓⵔⴰⵢⵜ ⵏ ⵍⵎⵖⵔⵉⴱ ⵍⵄⴰⵕⴰⴱⵉ ⵏ ⵉⵏⵖⵎⵉⵙⵏ, ⴹⴰⵕⵜ ⵏ ⵉⵎⴷⵉⵡⴰⵍ ⵏⵏⴰ ⵉⵙⴽⵔ ⴳ ⵓⵙⵓⵏⵙⵢⵓⵏ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙⵙ ⵕⴰⵛⵉⴷ ⵟⵟⴰⵍⴱⵉ ⵍⵄⴰⵍⴰⵎⵉ, ⵙ ⵜⵎⵍⴷⴰ ⵏ ⵓⵙⵎⴷⵢⴰ ⵏⵏⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴳ ⵜⴼⵓⴳⵍⴰ ⵏ ⵓⵙⴱⴷⴰⴷ ⵏ ⵓⵏⵙⵙⵉⵅⴼ ⴰⴱⴰⵔⴰⴳⵡⴰⵢⴰⵏⵉ ⴰⵎⴰⵢⵏⵓ, ⵙⴰⵏⵜⵢⴰⴳⵓ ⴱⵉⵏⵢⴰ, " ⵣⵖ ⵍⴱⴰⵔⴰⴳⵡⴰⵢ ⴷⴰⵔⵏⵖ ⵢⴰⵜ ⵜⵉⵔⵉⵜ ⵉⵙⴷⴷⵉⴷⵏ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⵏⵜⵎ ⵏ ⵉⵙⵖⵡⴰⵏ ⵉⵎⵣⵔⴰⵢⵏ ⵏⵏⴰ ⵉⵙⵎⵓⵏⵏ ⵉⵎⴰⴷⴰⵏⵏ ⵙ ⵙⵉⵏ.
ⵉⵔⵏⵓ ⵓⵏⵙⵙⵉⵅⴼ ⵏ ⵉⵎⵓⵔⴰ ⴰⴱⴰⵔⴰⴳⵡⴰⵢⴰⵏⵉ ⵎⴰⵙ ⴷ ⵉⵎⴷⵉⵡⴰⵍ ⵏⵏⵙ ⴷ ⵎⴰⵙⵙ ⵟⵟⴰⵍⴱⵉ ⵍⵄⴰⵍⴰⵎⵉ ⵜⵓⵊⵊⴰ ⵓⵍⴰ ⵜⴰⵡⴰⴼⵉⵜ ⵏ ⵢⴰⵜ ⵜⵓⵔⵉⵜ ⵉⵛⵛⴰⵔⵏ ⵉ ⵡⵓⵍⵓⵢ ⵙ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⵉⴷⴷⵓⴽⴽⵯⵍⴰ ⵏⵏⴰ ⵉⵙⵎⵓⵏⵏ ⵜⵉⵎⵉⵣⴰⵔ ⴰⴷ ⵙ ⵓⵢⴰ "ⵏⴽⴽⵯⵏⵉ ⴷ ⵉⵎⵖⵔⵉⵜⵏ ⴰⴷ ⵜⵏⵜ ⵏⵙⵏⵜⵎ ⵙ ⵜⵡⵉⵍⴰ ⵉⵎⵇⵇⵓⵔⵏ".
ⵢⴰⵎⵥ ⵅⴼ ⵎⴰⵙ ⴷ ⵉⵇⵇⴰⵏ ⴰⴷ ⵜⵜⵢⴰⴼⴰⵏⵜ ⵜⴱⵔⵉⴷⵉⵏ ⵏ ⵜⵣⵣⵉⴳⵣⵜ ⵙ ⵓⵎⴷⴷⵓⵔ ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⴳⵔ ⵉⴱⵕⵍⴰⵎⴰⵏⵏ ⵏ ⵜⵎⵉⵣⴰⵔ ⵙ ⵙⵏⴰⵜ ⴷ ⵓⴳⴳⴷⴰⵎ ⵅⴼ ⵓⵙⴱⵓⵖⵍⵓ ⵏ ⵜⵣⴷⴰⵢⵉⵏ ⵏ ⵜⵙⴱⴱⴰⴱⵜ ⴷ ⵓⵙⵏⵜⵎ ⵏ ⵢⵉⵎⴰⵙⵙⵏ ⵏ ⵓⵣⴷⴷⵓⵢ ⴷ ⵡⴰⵏⵏⴰⵍ ⴰⵙⵔⵜⴰⵏ ⴰⵎⵢⴰⵖⴰⵏ ⵏ ⵉⵎⵏⴰⴷⵏ ⵏ ⵜⵎⵉⵣⴰⵔ ⵙ ⵙⵏⴰⵜ ⴳ ⵜⴼⵓⴳⵍⵉⵡⵉⵏ ⵜⵉⴳⵔⴰⵖⵍⴰⵏⵉⵏ ⵙ ⵎⴰⴷ ⵉⵣⴷⵉⵏ ⵙ ⵜⵓⴳⵜⵜ ⵏ ⵜⵎⵙⴰⵔⵉⵏ ⵉⵛⵛⴰⵔⵏ ⵏⵏⴰ ⵜⵏⵜ ⵉⵙⵎⵓⵏⵏ.
ⵉⵏⵏⴰ ⵓⵎⴰⵙⴰⵢ ⴰⴱⴰⵔⴳⵡⴰⵢⴰⵏⵉ, ⵎⴰⵙ ⴷ ⴰⵙⴷⵓⵙ ⵏ ⵉⵙⵖⵡⴰⵏ ⵉⵙⵔⵜⴰⵏⵏ ⴷ ⵉⵙⵔⵜⴰⵏⵏ ⵙ ⵜⵓⵥⵍⴰⵢⵜ, ⵉⵥⴹⴰⵕ ⴰⴷ ⵉⵙⵔⴱⵉ ⵜⴰⵖⴰⵡⵍⴰ ⵏ ⵜⵎⵔⵏⵉⵡⵜ ⴷ ⵜⴳⵎⵉ ⴳ ⵜⵎⵉⵣⴰⵔ ⴰⴷ ⵏⵏⴰ ⵉⵟⵟⴰⴼⵏ ⵜⵉⵥⵉⴹⴰⵕ ⴳⴳⵓⵜⵏⵉⵏ ⵙ ⴷ ⵉⵇⵇⴰⵏ ⵓⵙⵢⴰⴼⴰ ⵏⵏⵙⵏⵜ.
ⵉⴽⴽⴰ ⵜⵜ ⵉⵏⵏ ⵓⵏⵙⵙⵉⵅⴼ ⵏ ⴱⴰⵔⴰⴳⵡⴰⵢ ⴰⵎⴰⵢⵏⵓ, ⵙⴰⵏⵜⵢⴰⴳⵓ ⴱⵉⵏⵢⴰ, ⵉⵙⴰⵡⵍ ⵅⴼ ⵍⵎⵔⵉⴱ ⵏⵏⴰ ⵉⵥⵍⵉ ⵉ ⵎⴰⵙⵙ ⵟⵟⴰⵍⴱⵉ ⵍⵄⴰⵍⴰⵎⵉ, ⵎⴰⵙ ⴷ ⵍⵎⵖⵔⵉⴱ ⵉⴳⴰ ⵉ ⵍⴱⴰⵔⴰⴳⵡⴰⵢ ⴷ ⵜⵎⵉⵣⴰⵔ ⴰⴽⴽⵯ ⵏ ⵎⵉⵔⵉⴽⴰⵏ ⵏ ⵢⵉⴼⴼⵓⵙ ⵜⴰⴳⴳⵓⵔⵜ ⵜⴰⵎⴷⵢⴰⵜ ⵉ ⵓⵙⵉⴷⴼ ⵖⵔ ⵉⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⴰⵕⴰⴱ.
ⵉⵙⴷⴷⵉⴷ ⵓⵏⵙⵙⵉⵅⴼ ⴰⴱⴰⵔⴳⵡⴰⵢⴰⵏⵉ ⵎⴰⵙ ⴰⵔ ⵉⴷⵔⵔⵓ ⵏⵜⵜⴰ ⴷ ⵜⵓⴳⵜⵜ ⵏ ⵉⵎⴰⵡⴰⵢⵏ ⵏ ⵉⵡⴰⵏⴽⵏ ⵏ ⵜⵙⴳⴰ, ⵢⴰⵜ ⵜⴰⵏⵏⴰⵢⵜ ⵉⵜⵜⵙⵎⴷⵢⴰⵏ ⵎⴰⵙ ⵉⴳⴰ ⵍⵎⵔⵉⴱ ⵜⴰⴳⴳⵓⵔⵜ ⵉⵏⵏⵓⵕⵥⵎⵏ ⵖⵔ ⵉⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⴰⵕⴰⴱ, ⵉⵍⵓⵃ ⵜⵉⴼⴰⵡⵜ ⵅⴼ ⵜⵎⵍⴰⵍⵜ ⵉⵙⵜⴰⵡⵀⵎⵎⴰⵏ ⵏ ⵍⵎⵖⵔⵉⴱ ⴳ ⵜⴳⵎⵉ ⵏ ⵢⵉⴼⴼⵓⵙ ⵙ ⵜⵡⵉⵍⴰ ⵜⴰⵎⴰⵜⴰⵢⵜ, ⵙ ⵓⵢⴰ ⴰⵙⴷⵓⵙ ⵏ ⵓⵎⵢⴰⵡⴰⵙ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉⵥⴹⴰⵕ ⴰⴷ ⵉⴷⵃⵉ ⵙ ⵜⵣⴷⴰⵢⵉⵏ ⵉⴼⴼⵓⵙ ⵉⴼⴼⵓⵙ ⵖⵔ ⵓⵖⵓⵖⵍⵓ ⴷ ⵜⵎⵔⵏⵉⵡⵜ.