ⵜⴳⴰ ⵜⵎⵍⴷⴰ ⴰⴷ ⴷ ⵜⴼⵓⴳⵍⴰ ⴰⴷ ⵏⵏⴰ ⴱⴷⴷⴰ ⵉⵙⴽⴰⵔ ⵓⵙⵉⵏⴰⴳ ⴰⴼⴰⴷ ⴰⴷ ⵉⵙⵓⵙⵙⵏ ⵉⵙⵙⵎⵖⵕ ⵙ ⵉⵡⵔⵉⴽⵏ ⵏⵏⴰ ⴼⴽⴰⵏⵉⵏ ⴽⵉⴳⴰⵏ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ .
ⵉⵏⵏⴰ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⵃⵎⴰⴷ ⴱⵓⴽⵓⵙ ⵎⴰⵙ ⵉⵎⵢⴰⵙⵙⴰⵏ ⴷ ⵎⵉⵛⵉⵍ ⴱⵉⵕⵓⵏ ⵏⵏⴰ ⵉⵜⵜⴰⵡⵙⵙⴰⵏⵏ ⵙ ⵉⵣⵎ ⴰⴱⵕⴱⴰⵛ ⴳ ⵙⵙⵜⵜⵉⵏⴰⵜ ⵏ ⵜⴰⵙⵓⵜ ⵉⵣⵔⵉⵏ ⴳ ⵜⵙⴷⴰⵡⵉⵜ ⵏ ⵜⵙⴽⵍⴰ ⵏ ⵕⵕⴱⴰⵟ, ⵖⵉⵏⵏ ⴰⴳ ⵙⵙⴷⵔⴰⵏ ⵜⵓⵙⵙⵏⴰ ⵏⵏⵙⵏ .
ⵉⵣⴰⵢⴷ ⴱⵓⴽⵓⵙ ⵉⵏⵏⴰ ⵎⴰⵙⴷ ⴱⵉⵕⵓⵏ ⵉⴳⴰ ⴰⵎⴰⵙⵙⴰⵏ ⵏ ⴽⵉⴳⴰⵏ ⵏ ⵜⵓⵎⵍⴰⵢⵉⵏ ⵅⴼ ⵜⵎⴰⵣⵉⵖⵜ ⵢⵉⵡⵙ ⴰⵡⴷ ⴰⴷ ⵙⵔⵙ ⵉⵙⵓⵙⵙⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵙⵙⵏ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵥⵍⵉ ⴰⵙ ⴽⵉⴳⴰⵏ ⵏ ⵜⵉⵣⵉ .
ⵉⴳ ⴰⵡⴷ ⴰⵏⵎⵎⴰⴷⴷⵓ ⵍⵍⵉⵖ ⵉⵎⵎⴰⴳⴰⵔ ⴷ ⵉⵎⵣⴷⴰⵖ ⵏ ⵄⴰⵔⵉ ⴰⴼⴰⴷ ⴰⴷ ⴷⵉⵙⵏ ⵉⵎⵔⴰⵔⴰ ⵉⵡⴰⵍⵉⵡⵏ ⴳ ⵎⴰⴷ ⵉⵣⵍⵉⵏ ⵙ ⵜⵓⵙⵙⵏⴰ ⴷ ⵜⴷⵍⵙⴰ ⵏⵏⵙⵏ .
ⵉⵍⵎⴷ ⵎⴰⵙⵙ ⴱⵉⵕⵓⵏ ⵜⴰⵎⴰⵣⵉⵖⵜ ⴽⵉⴳⴰⵏ ⵉⵖⵔⴰ ⴽⵉⴳⴰⵏ ⵏ ⵉⴷⵍⵉⵙⵏ ⵉⵙⴽⵔ ⴰⵡⴷ ⵢⴰⵜ ⵜⴷⵍⴰ ⵏ ⵜⵎⴷⵢⴰⵣⵉⵏ, ⵉⴷⵔⵓ ⴰⵡⴷ ⴽⵉⴳⴰⵏ ⵏ ⵉⵎⴰⴳⵔⴰⴷⵏ ⵅⴼ ⵜⵓⵙⵙⵏⴰ ⴷ ⵜⴷⵍⵙⴰ ⵜⴰⵎⴰⵣⵉⵖⵜ .
ⵉⵏⵏⴰ ⵎⴰⵙⵙ ⴱⵉⵕⵓⵏ ⵎⴰⵙⴷ ⵉⵔⵣⵣⵓⵜⵏ ⵏⵏⵙ ⵅⴼ ⵜⵎⴰⵣⵉⵖⵜ ⵙⴽⴰⵏ ⵅⴼ ⵓⵙⵉⴳⴳⵍ ⴷ ⵓⵔⵣⵣⵓ ⴳ ⵡⴰⵢⴷⴰ , ⵉⵏⵏⴰ ⵎⴰⵙⴷ ⵜⴰⵢⵔⵉ ⵏⵏⵙ ⵉ ⵜⵎⴰⵣⵉⵖⵜ ⵜⵓⵊⵊⴰⵜ ⴰⴷ ⵉⴳ ⴰⵙⵍⵎⴰⴷ ⵏ ⵓⵎⵣⵔⵓⵢ ⴰⵎⴰⵣⵉⵖ ⴳ ⵜⵙⴷⴰⵡⵉⵜ ⵏ ⵍⴰⵅⴰⵡⴰⵢⵏ 2001-2009 ⴷ ⵍⵍⵉⵖ ⵉⴳⴰ ⴰⵙⵍⵎⴰⴷ ⵏ ⵓⵙⵓⵖⵍ ⵙⴳ ⵜⵎⴰⵣⵉⵖⵜ ⴰⵔ ⵜⴰⴼⵕⴰⵏⵙⵉⵙⵜ ⴳ ⵜⵙⴷⴰⵡⵉⵜ ⵏ ⵜⵙⴽⵍⴰ ⴷ ⵜⵓⵙⵙⵏⵉⵡⵉⵏ ⵜⵉⵏⴼⴳⴰⵏⵉⵏ ⴳ ⵕⵕⴱⴰⵟ .
ⵜⵜⵓⵏⵏⴰⵏⵜ ⴽⵉⴳⴰⵏ ⵏ ⵜⵓⴳⴳⵉⵡⵉⵏ ⵅⴼ ⵎⴰⵙⵙ ⴱⵉⵕⵓⵏ ⵍⵍⵉⵖ ⵙⵙⵔⵏⴰⵏⵜ ⵜⵥⵕⵉⴳⵉⵏ ⵏⵏⵙ ⵜⵉⵙⴷⵍⵉⵙⵉⵏ ⵜⵉⵏⴰⵎⵓⵔⵉⵏ ⴷ ⵜⵙⴷⵍⵉⵙⵜ ⵜⴰⵎⴰⵣⵉⵖⵜ, ⴷ ⵉⴳⴰ ⴰⵎⴰⵣⴰⵏ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⵉⵏⵢⴰⵍⴽⴰⵎ ⴷ ⴽⵉⴳⴰⵏ ⵏ ⵉⵡⴷⴰⵏ ⵉⵎⵣⴷⴰⵖ ⵏⵏⴰ ⴰⵙ ⵉⴳⴰⵏ ⴰⴷⴷⵓⵔ ⴷ ⵓⵙⵏⵓⴱⴳ .