ⴰⵡⵜⵜⴰⵙ ⵏ ⵓⵏⵎⵓⵇⵇⴰⵔ ⴰⴷ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ ⵓⵙⴰⵜⵉ ⵏ ⵜⵉⵍⴰⵍ ⵏ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵏ ⵓⵎⵣⵔⵓⵢ ⴷ ⵜⵡⵏⵏⴰⴹⵜ ⵏ ⵓⵙⵉⵏⴰⴳ , ⵙ ⵜⴷⵔⴰⵡⵜ ⴰⴽⴷ ⵜⵎⵙⵎⵓⵏⵜ ⵏ "ⵎⴰⴷⵉⵙⵜⵓⵏ ⵍⵎⵖⵔⵉⴱ ", ⴷ ⵜⵓⴳⵜⵜ ⵏ ⵜⵎⵔⵙⴰⵍ ⵜⵉⵎⴰⵙⵙⴰⵏⵉⵏ, ⵜⴰⵎⵢⴰⴷⴰⵙⵜ ⵏ ⵜⵓⵥⵍⵉⵡⵉⵏ ⵏ ⵓⵣⴷⴷⵓⵖ ⴷ ⵜⵖⵖⵓⵔⵎⴰ ⴳ ⵜⴼⵔⵉⵇⵜ ⵏ ⵉⵥⵥⵍⵎⴹ ⴷⴰⵜ ⵏ ⵓⵙⴷⵓⵔⵔⵉ ⴰⵕⵓⵎⴰⵏⵉ.
ⵉⵏⵏⴰ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⵎⵓⵃⵎⵎⴰⴷ ⴱⵓⴽⵓⵙ ⴳ ⵜⴳⵓⵔⵉ ⵙ ⵜⵎⵍⴷⴰ ⴰⴷ, "ⴰⵙⵜⴰⵢ ⵏ ⵓⵣⴷⴷⵓⵖ ⴷ ⵜⵖⵖⵓⵔⵎⴰ ⴳ ⵜⴼⵔⵉⵇⵜ ⵏ ⵉⵥⵥⵍⵎⴹ, ⴰⴷ ⵜⵏⵓⵕⵥⵓⵎ ⴰⴱⵔⵉⴷ ⵉ ⵉⵙⵏⵓⴱⴱⵓⵛⵏ ⵉⵎⴰⵢⵏⵓⵜⵏ ⴳ ⵓⵣⵎⵣ ⴰⴷ ⴰⵎⵣⵔⵓⵢ, ⵏⵏⴰ ⵢⴰⴽⴽⴰⵏ ⵜⴰⵏⵏⴰⵢⵉⵏ ⵏⵏⵖ ⵅⴼ ⵜⵉⵣⵉ ⴰⴷ ⵙⴳ ⴰⵎⵣⵔⵓⵢ ⵏ ⵜⵎⵏⴰⴹⵜ".
ⴷⴰⵜ ⵏ ⵎⴰ ⴷ ⵉⵣⵎⵎⴻⵎ ⵎⴰⵙ ⴷ ⴷⵔⵓⵙⵏⵜ ⵜⵖⵓⵔⵉⵡⵉⵏ ⴳ ⵜⵉⵣⵉ ⴰⴷ ⵜⴰⵎⵣⵔⵓⵢⵜ, ⵉⵏⵏⴰ ⵎⴰⵙ ⴷ "ⵜⵓⵚⴽⴰ ⵏ ⵡⴰⵎⵎⴰⵙ ⴰⵏⴰⵎⵓⵔ ⵏ ⵜⵎⴰⵙⵙⴰⵏⵉⵏ ⵏ ⵜⴰⵢⵙⵉ ⴷ ⵡⴰⵢⴷⴰ ⵉⵙⴱⵓⵖⵍⴰ ⵉⵙⵏⵓⴱⴱⵓⵛⵏ ⴷ ⵜⵎⴰⴳⵉⵜ ⵏⵏⵖ, ⵎⵉⵏⵣⵉ ⴳⴰⵏ ⵉⵙⵏⵓⴱⴱⵓⵛⵏ ⵢⴰⵜ ⵜⵎⴰⵎⴽⵜ ⵏ ⵡⴰⵍⵍⴰⵙ ⵏ ⵜⵓⵚⴽⴰ ⵏ ⵜⴰⵢⵙⵉ ⴷ ⵡⴰⵢⴷⴰ ⵏⵏⵖ.
ⴳ ⵜⵙⴳⴰ ⵏⵏⵉⴹⵏ , ⵉⵙⴷⴷⵉⴷ ⵓⵏⵎⵀⴰⵍ ⵏ ⵡⴰⵎⵎⴰⵙ ⴰⵏⴰⵎⵓⵔ ⵏ ⵜⵎⴰⵙⵙⴰⵏⵉⵏ ⵏ ⵜⴰⵢⵙⵉ ⴷ ⵡⴰⵢⴷⴰ, ⵎⴰⵙⵙ ⵄⴰⴱⴷⵍⵊⵍⵉⵍ ⴱⵓⵣⴳⴳⴰⵔ, ⵎⴰⵙ ⵜⵉⵏⴰⵡⵜ ⵖⵓⵔⵙ ⵢⴰⵜ ⵜⵉⵏⴷⵉ ⵎⵉⵏⵣⵉ ⴰⴷ ⵜⵙⵙⵉⵙⴼⵉⵡ ⵅⴼ ⵜⵙⴳⴳⵯⵡⵉⵏ ⵜⵉⵖⵔⵎⴰⵏⵉⵏ ⵏ ⵜⵎⵏⴰⴹⵜ ⵏ ⵜⴼⵔⵉⵇⵜ ⵏ ⵉⵥⵥⵍⵎⴹ ⴷⴰⵜ ⵏ ⵓⵙⴷⵓⵔⵔⵉ ⴰⵕⵓⵎⴰⵏⵉ, ⵎⵉⵏⵣⵉ ⴰⵙⴷⵓⵔⵔⵉ ⴰⴷ ⵓⵔ ⵢⵓⴼⵉ ⵖⴰⵙ ⵍⵅⵍⴰ, ⵎⴰⵛⵛ ⵢⵓⴼⴰ ⴷ ⴰⴳⴷⵓⴷ ⴷ ⵉⴽⴰⴱⴰⵕⵏ ⵉⵏⴼⴳⴰⵏⵏ ⵏⵏⴰ ⵉⴷⴷⵔⵏ ⴳ ⵜⵖⵔⵎⴰ ⴷ ⵓⵙⵏⵎⴰⵍⴰ ⴰⵏⴰⵎⵓⵏ ⴷ ⵓⴷⵎⵙⴰⵏ ⴷ ⵓⵙⵔⵜⴰⵏ ⴷ ⵓⵙⵖⴰⵏ".
ⵍⵍⵉ ⴳ ⵉⴱⵔⵣ ⵎⴰⵙ ⴷ ⴰⵙⵉⵙⴼⵉⵡ ⴰⴷ ⵉⵙⵜⴰⵡⵀⵎⵎⴰ ⵖⵓⵔ ⵉⵎⵙⵏⵓⴱⴱⵛⵏ ⴷ ⵉⵎⵣⵔⴰⵡⵏ ⵏ ⵓⵎⵣⵔⵓⵢ ⴷ ⵜⵎⴰⵙⵙⴰⵏⵉⵏ ⵏ ⵜⴰⵢⵙⵉ, ⵉⵙⴷⴷⵉⴷ ⵎⴰⵙⵙ ⴱⵓⵣⴳⴳⴰⵔ ⵎⴰⵙ ⴰⵔ ⵢⴰⴽⴽⴰ ⵓⵙⵉⵏⴰⴳ ⵢⴰⵜ ⵜⵉⵏⴷⵉ ⵜⴰⵎⵇⵔⴰⵏⵜ ⵉ ⵜⵉⵣⵉ ⴰⴷ ⵜⴰⵎⵣⵔⵓⵢⵜ ⵙⴳ ⵓⵙⵏⵓⴱⴱⵛ ⴷ ⵓⵙⵏⵉⵖⵙ.
ⵎⴽ ⵍⵍⵉ ⵙ ⵉⵏⵏⴰ ⵓⵏⵎⵀⴰⵍ ⴰⵙⴳⴰⵡⴰⵏ ⵏ ⵜⵎⴰⵡⴰⵙⵜ ⵏ ⵜⴷⵍⵙⴰ ⵏ ⵕⵕⴱⴰⵟ - ⵙⵍⴰ - ⵍⵇⵏⵉⵟⵕⴰ, ⵎⴰⵙⵙ ⵄⵣⵣⴷⴷⵉⵏ ⴽⴰⵔⴰ, ⵎⴰⵙ ⵉⴷⵔⵓⵙ ⵎⴰⴷ ⵉⵙⴰⵡⴰⵍⵏ ⵅⴼ ⵓⵙⵏⵜⵍ ⵏ ⵜⵉⵏⴰⵡⵜ ⴰⴷ, ⵜⴳⴰ ⴰⵡⴷ ⵢⴰⵏ ⵓⵣⵎⵣ ⵏ ⵓⵙⵎⵣⴰⵣⴰⵍ ⴷ ⵓⴹⴼⵓⵕ ⵏ ⵉⵙⵏⵓⴱⴱⵓⵛⵏ ⴳ ⵜⴼⵔⵉⵇⵜ ⵏ ⵉⵥⵥⵍⵎⴹ ⴷ ⴱⵕⵕⴰ ⵏⵏⵙ.
ⴰⵡⴷ ⵜⴰⴷⵔⴰⵡⵜ ⵏ ⵜⵎⴰⵡⴰⵙⵜ ⴳ ⵜⵉⵏⴰⵡⵜ ⴰⴷ, ⵜⵓⵛⴽⴰⴷ ⵙⴳ ⵜⴰⵢⵙⵉ ⴷ ⵡⴰⵢⴷⴰ ⴰⵇⴱⵓⵔ ⵏⵏⴰ ⵙ ⵜⵜⴰⵡⵙⵙⴰⵏ ⵜⵙⴳⴰ ⵏ ⵕⵕⴱⴰⵟ ⵙⵍⴰ ⵍⵇⵏⵉⵟⵕⴰ, ⴷ ⵜⵎⵢⵉⵎⴰⵏⵜ ⵏⵏⵖ ⵙ ⵡⴰⴷⴷⵓⵔ ⵏ ⵜⴰⵔⴽⵢⵓⵍⵓⵊⵉⵢⵜ ⴳ ⵓⵙⵎⴰⵙⵙⵏ ⵙ ⵢⴰⵜ ⵜⵉⵣⵉ ⵜⴰⴷⵙⵍⴰⵏⵜ ⵙⴳ ⵓⵎⵣⵔⵓⵢ ⵏ ⵍⵎⵖⵔⵉⴱ.
ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵏ "ⵎⴰⴷⵉⵙⵜⵓⵏ ⵍⵎⵖⵔⵉⴱ" ⵉⵏⵏⴰ ⵎⴰⵙ ⴷⵔⵓⵙⵏ ⵉⵙⵓⴳⴰⵎ ⵏⵏⴰ ⵉⵙⴰⵡⵍ ⵅⴼ ⵜⵉⵣⵉ ⴰⴷ ⵜⴰⵎⵣⵔⵓⵢⵜ, ⵎⴰ ⴰⵏ ⴰⴼ ⵉⵜⵜⴰⵖⵓⵍ ⵓⵎⵙⵏⵓⴱⴱⵛ ⵙ ⵜⵓⵖⵣⵉⵡⵉⵏ ⴷ ⵜⴰⵔⴽⵢⵓⵍⵓⵊⵉⵢⵜ, ⵃⵎⴰ ⵢⵉⵍⵉ ⵡⴰⵍⵍⴰⵙ ⵏ ⵜⵉⵔⵔⴰ ⵏ ⵓⵎⵣⵔⵓⵢ ⵏ ⵍⵎⵖⵔⵉⴱ, ⵉⴱⵔⵣ ⵎⴰⵙ ⵜⴳⴰ ⵜⵉⵏⴰⵡⵜ ⴰⴷ ⴰⵣⵎⵣ ⵃⵎⴰ ⴰⴷ ⵙⵎⵢⴰⵙⵙⴰⵏ ⵜⵉⴼⵔⴽⵜ ⴰⴷ ⵏ ⵓⵎⵣⵔⵓⵢ ⵏⵏⵖ
ⵉⵍⵍⴰ ⴳ ⵓⵖⴰⵡⴰⵙ ⵏ ⵜⵉⵏⴰⵡⵜ ⴰⴷ ⴽⵕⴰⴹⵜ ⵜⵙⵇⵇⵉⵎⵏ, ⵜⴰⵎⵣⵡⴰⵔⵓⵜ ⵜⴳⴰ ⴰⵥⵓⵕ ⵏ ⵓⵣⴷⴷⵓⵖ ⴷ ⵡⴰⵏⴰⵡⵏ ⵏ ⵜⵓⴷⵔⵜ ⵏ ⵉⵎⵣⴷⴰⵖⵏ ⴳ ⵎⵓⵔⵉⵟⴰⵏⵢⴰ ⵏ ⵜⴰⵙⵓⵜ, ⵜⵉⵙⵙ ⵙⵏⴰⵜ ⴰⵙⵏⵜⵍ ⵏⵏⵙ ⵉⴳⴰ " ⵜⵓⵚⴽⴰ ⴷⴰⵜ ⵏ ⵜⵉⵣⵉ ⵜⴰⵕⵓⵎⴰⵏⵉⵢⵜ ⴳ ⵜⴼⵔⵉⵇⵜ ⵏ ⵉⵥⵥⵍⵎⴹ" , ⵜⴰⵎⴳⴳⴰⵔⵓⵜ ⵜⴳⴰ " ⴰⵙⴷⵓⵔⵔⵓⵢ ⵏ ⵓⵙⵓⵏ ⴷ ⵜⵖⵖⵓⵔⵎⴰ ⴳ ⵍⵎⵖⵔⵉⴱ ⴷⴰⵜ ⵏ ⵜⵉⵣⵉ ⵜⴰⵕⵓⵎⴰⵏⵉⵢⵜ ".