ⵉⵏⵏⴰ ⵎⴰⵙⵙ ⵎⵓⵊⴰⵀⵉⴷ ⴳ ⵢⴰⵏ ⵓⵎⵙⴰⵡⴰⵍ ⴰⵏⵖⵎⴰⵙ ⵏⵏⴰ ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵏ ⵓⵙⵙⵏⴽⴷ ⵏ ⵓⵖⴰⵡⴰⵙ ⵏ ⵓⵙⴼⵓⴳⵍⵓ ⵏ ⵓⵙⵙⴽⵯⵜⵉ ⵡⵉⵙⵙ 22 ⵏ ⵉⵏⴰⵡ ⵏ ⴰⵊⴷⵉⵔ(17, 20 ⴽⵟⵓⴱⵕ 2023) ⵔⴰⴷ ⴷⵉⴳⵙ ⵢⵉⵍⵉ ⵜⵓⴳⵜ ⵏ ⵉⵙⴼⵙⴰⵔⵏ ⵏ ⵜⵥⵓⵕⵉ, ⴷ ⵜⵙⵎⵖⵓⵔⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⵙ ⵡⴰⵏⴰⵡⵏ ⵏⵏⵙ ⴰⴽⴽⵯ, ⴰⵡⴷ ⵜⵉⵏⴰⵡⵜ ⵏⵏⴰ ⵔⴰⴷ ⵉⵙⴰⵡⵍ ⵅⴼ ⵓⵙⵎⵀⵍ ⵓⵏⵚⵉⴱ ⵏ ⵜⵎⴰⵣⵉⵖⵜ ⴷ ⵜⴼⵓⴳⵍⴰ ⵓⵥⴰⵡⴰⵏ ⵉⵎⵢⴰⵏⴰⵡⵏ.
ⵉⵏⵏⴰ ⵎⴰⵙⵙ ⵎⵓⵊⴰⵀⵉⴷ ⵎⴰⵙ ⴷ ⵜⴰⵙⵓⵜⵍⵜ ⴰⴷ ⵜⴻⵜⵜⴰⵡⵙⵜⴰⵢ ⴰⵙ ⵢⴰⵜ ⵜⵎⴰⵜⴰⵔⵜ ⵏⵏⴰ ⵉⴳⴰⵏ "ⴰⵏⴳ ⴰⴼⵓⵙ ⴳ ⵓⴼⵓⵙ ⴰⴷ ⵏⵏⴰⵍ ⵜⵓⵙⵙⵏⴰ ⵏⵏⵖ ⵜⴰⵎⴰⵣⵉⵖⵜ ⵙ ⵡⴰⴼⴰ", ⴰⵏⴰⵎⴽ ⵏⵏⵙ ⵉⴳⴰ ⵎⴰⵙ ⵜⴳⴰ ⵜⵎⴰⵣⵉⵖⵜ ⵜⴰⵎⵙⵜⴳⴳⴰⵔⵜ ⵜⴰⵏⴰⵎⵓⵔⵜ ⵏⵏⴰ ⵙ ⴷ ⵉⵇⵇⴰⵏ ⴰⴷ ⵙⵉⵙ ⵏⵏⴰⵍ.
ⵎⴽ ⵍⵍⵉ ⵙ ⵉⵏⵏⴰ ⵎⴰⵙ ⴷ ⵉⵏⴰⵡ ⴰⴳⵍⴷⴰⵏ ⴳ ⴰⵊⴷⵉⵔ ⵉⴳⴰ ⵢⴰⵜ ⵜⵎⵍⴷⴰ ⵏ ⵜⴰⵏⵏⴰⵢⵜ ⴳ ⵎⴰⴷ ⵉⵜⵜⴰⵡⵙⴽⴰⵔⵏ ⵉ ⵜⵎⴰⵣⵉⵖⵜ , ⴷ ⵜⵉⵔⵎⵉⵜ ⵏ ⵎⴰⵕⵕⴰ ⵜⵉⵡⵓⵔⵉⵡⵉⵏ ⵏⵏⴰ ⴷⵉⵙ ⵉⵣⴷⵉⵏ.
ⴳ ⵜⵙⴳⴰ ⵏⵏⵉⴹⵏ, ⵉⵏⵏⴰ ⵓⵏⵙⵙⵉⵅⴼ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ 2022 ⴽⴰⵔⵉⵎ ⵙⵓⴽⴰⵙ, ⵎⴰⵙ ⵜⴳⴰ ⵜⵙⵎⵖⵓⵔⵜ ⴰⴷ ⵢⴰⵜ ⵜⵉⵣⵉ ⵏ ⵓⵙⵙⵕⵚⵓ ⵏ ⵜⴷⵍⵙⴰ ⵏ ⵓⵙⵙⵉⵎⵖⵔ ⴷ ⵓⵙⴱⵖⵙ ⵏ ⵜⵓⴳⵜⵜ ⵏ ⵉⵏⴰⵥⵓⵕⵏ ⴷ ⵉⵎⵙⵏⴼⵍⵓⵍⵏ ⴷ ⵎⴰⴷ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵜⵖⵓⵔⵉⵡⵉⵏ ⵔ ⵓⵙⵏⴼⵍⵓⵍ ⵏ ⵜⵎⴰⵣⵉⵖⵜ ⴰⴽⴽⵯ.
ⵉⵏⵏⴰ ⴰⵡⴷ ⵎⴰⵙ ⵜⴳⴰ ⵜⵙⵎⵖⵓⵔⵜ ⴰⴷ ⵢⴰⵜ ⵜⵙⵏⵜⴰⵢⵜ ⵏ ⵓⵙⵏⵉⵎⵎⵔ ⵏⵏⴰ ⵢⵉⵡⵙⵏ ⴳ ⵓⵙⴷⵓⵙ ⵏ ⵓⵙⵏⵓⴱⴱⵛ ⴳ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵡⴰⵏⴰⵡⵏ ⵏⵏⵙ ⴰⴽⴽⵯ, ⴷ ⵉⵖⵔⴰ ⵉ ⵎⴰⵕⵕⴰ ⵎⴰⴷ ⵉⵙⵡⵓⵔⵉⵏ ⴳ ⵢⵉⴳⵔ ⴰⴷ ⵏ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⴷ ⴷⵔⵓⵏ ⵎⴽ ⴳⴰⵏ ⵉⵎⵔⵣⵓⵜⵏ ⵏⵉⵖ ⵉⵏⴰⵥⵓⵕⵏ ⵏⵉⵖ ⵉⵎⵙⵏⴼⵍⵓⵍⵏ.
ⵜⵏⵏⴰ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ 2022 ⵚⴰⴱⴰⵃ ⵄⵍⴰⵛ , ⵎⴰⵙ ⴷ ⵜⴰⵙⵎⵖⵓⵔⵜ ⴰⴷ ⵜⴳⴰ ⵢⴰⵜ ⵙⴳ ⵜⴱⵔⵉⴷⵉⵏ ⵏⵏⴰ ⵅⴼ ⵉⵙⵡⵓⵔⵉ ⵓⵙⵉⵏⴰⵙ ⴰⴳⵍⴷⴰⵏ ⴳ ⵓⵙⴰⵜⵉ ⵏ ⵓⵣⵣⵓⴳⵣ ⵏ ⵜⵙⵜⵔⴰⵜⵉⵊⵉⵢⵜ ⵏ ⵜⵏⴽⵔⴰ ⵙ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙⴳ ⵓⵙⵙⵉⵎⵖⵔ ⵏⵏⵙ ⴰⵙⴳⴳⵯⵙⴰⵏ ⵙⴳ 2004, ⵉ ⵜⵓⴳⵜⵜ ⵏ ⵉⵎⵔⵣⵓⵜⵏ ⴷ ⵉⵎⵙⵏⴼⵍⵓⵍⵏ ⴷ ⵜⵎⵙⵏⴼⵍⵓⵍⵉⵏ ⴳ ⵜⵓⴳⵜⵜ ⵏ ⵉⴳⵔⴰⵏ ⵏ ⵜⵓⵙⵙⵏⴰ ⴷ ⵜⵥⵓⵕⵉ ⴷ ⵓⵙⵏⴼⵍⵓⵍ ⴷ ⵓⵙⴳⵎⵉ.
ⵎⴽ ⵍⵍⵉ ⵙ ⵜⵏⵏⴰ ⴰⵡⴷ ⵎⴰⵙ ⴷ ⵜⴰⵙⵎⵖⵓⵔⵜ ⴰⴷ ⵜⴳⴰ ⵢⴰⵏ ⵓⵙⵔⵓⵙ ⴰⴷⵙⵍⴰⵏ ⵏ ⵓⵙⴱⵖⵙ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵜⵏⴽⵔⴰ ⵏⵏⵙ ⴷ ⵡⴰⵏⵏⴰⵍ ⵏ ⵉⵎⵔⵣⵓⵜⵏ ⴷ ⵜⵎⵔⵣⵓⵜⵉⵏ, ⴷ ⵉⵎⵙⵏⴼⵍⵓⵍⵏ ⴷ ⵜⵎⵙⵏⴼⵍⵓⵍⵉⵏ ⴳ ⵢⵉⴳⵔ ⵏ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ, ⴰⵡⴷ ⴰⵙⵏⵎⴰⵍⴰ ⵏ ⵓⵙⵉⵏⴰⵙ ⵏ ⵜⵙⵎⵖⵓⵔⵜ ⴰⴷ ⴳ ⵙⵏⴰⵜ ⵜⴰⵙⵓⵜⵉⵏ ⵣⴷⵉⵏⵉⵏ, ⵎⴰⴷ ⵉⴼⴽⴰⵏ ⵢⴰⵜ ⵜⵢⴰⴼⵓⵜ ⵉ ⵜⵉⵔⵎⵉⵜⵉⵏ ⵏⵏⵙ, ⵎⵉⵏⵣⵉ ⵜⴰⵙⵎⵖⵓⵔⵜ ⴰⴷ ⴷⴰⵔⵙ ⴰⴷⵖⴰⵔ ⴰⴷⵙⵍⴰⵏ ⴳ ⵜⵔⴰⵜⵙⴰ ⵏ ⵜⵙⵎⵖⵓⵔⵉⵏ ⵜⵉⵏⴰⵎⵓⵔⵉⵏ ⵏⵏⴰ ⴰⴽⴽⴰⵏⵜ ⵜⵎⵔⵙⴰⵍ ⵏ ⵜⴷⵍⵙⴰ ⵜⴰⵏⴰⵎⵓⵔⵜ.
ⵉⵎⵍⴰ ⵓⵏⵎⵀⴰⵍ ⵏ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵏ ⵜⵥⵓⵕⵉ ⴷ ⵜⵙⴽⵍⴰ ⴷ ⵓⴼⴰⵔⵙ ⴰⵎⵙⵙⴼⵍⵔ ⵓ ⵓⵎⵥⵔⵉ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⴰⵃⵎⴰⴷ ⵍⵎⵓⵏⴰⴷⵉ ⵎⴰⵙ ⴷ ⴰⵙⵉⵏⴰⵙ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉⵎⵎⴰⵖ ⴳ ⵜⵉⵍⴰⵍ ⵏⵏⵙ ⵜⵉⴳⵯⵙⴰⵏⵉⵏ ⵙⵍⴰⵡⴰⵏ ⴰⴽⴽⵯ ⵜⵉⴼⵓⴳⵍⵉⵡⵉⵏ ⵏ ⵉⵏⴰⵡ ⵏ ⴰⵊⴷⵉⵔ, ⵅⴼ ⵓⴽⵛⵛⵓⵎ ⵓⵎⵏⵉⴳ ⴳ ⵉⵚⵏⴼⴰⵕ ⵏ ⵜⵥⵓⵕⵉ ⵜⴰⵎⴰⵣⵉⵖⵜ ⵙⴳ ⵜⵙⴰⵔⵡⴰ ⵏ ⵜⴼⵓⴳⵍⵉⵡⵉⵏ ⵜⵉⵏⴰⵎⵓⵔⵉⵏ ⴷ ⵜⵉⵏ ⵓⵎⴰⴹⴰⵍ.
ⵎⴽ ⵍⵍⵉ ⵙ ⵉⵏⵏⴰ ⵎⴰⵙ ⵎⴰ ⴰⴷ ⴰⵔ ⵢⴰⴽⴽⴰ ⵏ ⵜⵎⵔⵙⵍⵜ ⵜⵉⵣⵎⵎⴰⵔ ⵏ ⵜⵥⵓⵔⵉ ⵏⵏⴰ ⵉⵍⵍⴰⵏ ⴳ ⵜⴳⵍⴷⵉⵜ, ⴷ ⵓⵙⴱⵖⵙ ⵏⵏⵙ ⴷ ⵓⵙⵙⵖⵥⵏ ⵙ ⵜⵥⵓⵕⵉ ⴷ ⵜⵓⵙⵙⵏⴰ.