ⴰⵡⵜⵜⴰⵙ ⵏ ⵓⵏⵎⵓⵇⵇⴰⵔ ⴰⴷ ⵏⵏⴰ ⵜⵙⵏⵎⴰⵍⴰ ⵜⵙⵓⵔⵜ ⵜⴰⵎⴰⵣⵉⵖⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴷⵔⴰⵡⵜ ⵏ ⵜⵎⴰⵡⴰⵙⵜ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵓⵎⵙⴰⵡⴰⴹ ⵉⴳⴰ ⵜ ⴰⴷ ⵉⵎⵍ ⵜⵓⴳⵜⵜ ⵏ ⵉⵎⵏⴰⴷⵏ ⵏ ⵡⴰⵢⴷⴰ ⵓⴷⴰⵢ ⴳ ⵡⴰⵎⵎⴰⵙ ⵏ ⵡⴰⴷ ⵏⵓⵏ, ⴷ ⵓⵙⵏⵓⴱⴱⵛ ⵅⴼ ⵜⴱⵔⵉⴷⵉⵏ ⵏ ⵓⵙⵙⵉⵜⴳ ⵏⵏⵙ ⴷ ⵓⵃⵟⵟⵓ ⵏⵏⵙ ⴷ ⵜⵙⴰⵔⵡⴰ ⵏⵏⵙ ⵎⴰⵙ ⵉⴳⴰ ⵢⴰⵏ ⵓⵙⴰⴳⵓⵎ ⴰⴷⵙⵍⴰⵏ ⴳ ⵓⴱⵓⵖⵍⵓ ⴰⵎⵓⵔⴰⵏ ⴳ ⵜⵎⵏⴰⴹⵉⵏ ⵏ ⵉⴼⴼⵓⵙ, ⴰⵡⴷ ⴰⴷ ⵉⴱⴰⵢⵏ ⵓⵙⵍⵉⴷ ⴰⵎⵖⵔⵉⴱⵉ ⴳ ⵜⵓⴷⴷⵓⵔⵜ ⴷ ⵙⵙⵓⵔⴼ ⴳⵔ ⵉⵙⵖⴰⵏ ⴷ ⵉⴼⵔⴷⵉⵙⵏ ⵏ ⵡⴰⵎⵓⵏ ⴰⵎⵖⵔⵉⴱⵉ ⴰⴽⴽⵯ.
ⵉⵙⴷⴷⵉⴷ ⵎⴰⵙⵙ ⵢⴰⵃⵢⴰ ⵍⵡⵣⴽⴰⵏⵉ ⵙⴳ ⵜⵙⴳⴰ ⵜⴰⵙⵏⵎⴰⵍⵜ ⴳ ⵜⴳⵓⵔⵉ ⵏ ⵓⵏⵏⵓⵕⵥⵎ ⵎⴰⵙ ⴷ ⴰⵏⵎⵓⵇⵇⴰⵔ ⴰⴷ ⵉⴳⴰ ⵢⴰⵜ ⵜⵎⵍⴷⴰ ⴰⴷ ⵜⵙⴱⴰⵢⵏ ⴰⵢⴷⴰ ⴰⴷⵙⵍⴰⵏ ⵏ ⵓⴷⴰⵢⵏ ⴳ ⵡⴰⵎⵎⴰⵙ ⵏ ⵡⴰⴷ ⵏⵓⵏ, ⵏⵏⴰ ⵉⴳⴰⵏ ⵢⴰⵜ ⵜⵎⴰⵜⴰⵔⵜ ⵏ ⵓⵎⵣⵔⵓⵢ ⵉⵖⵣⵣⵉⴼⵏ ⵏ ⵜⵓⴷⴷⵓⵔⵜ ⴷ ⵙⵙⵓⵔⴼ ⵊⴰⵔ ⵉⴼⵔⴷⵉⵙⵏ ⵏ ⵡⴰⵎⵓⵏ ⴰⵎⵖⵔⵉⴱⵉ.
ⵉⵏⵏⴰ ⴰⵡⴷ ⵎⴰⵙ ⴰⵏⵎⵓⵇⵇⴰⵔ ⴰⴷ ⴰⵡⵜⵜⴰⵙ ⵏⵏⵙ ⵉⴳⴰⵜ ⴰⵎⵙⴰⵡⴰⵍ ⵅⴼ ⵜⴱⵔⵉⴷⵉⵏ ⵏ ⵓⵙⵙⵉⵜⴳ ⵏ ⵡⴰⵢⴷⴰ ⵏ ⵓⴷⴰⵢⵏ ⴷ ⵜⵙⴰⵔⵡⴰ ⵏⵏⵙ ⵎⴰⵙ ⵉⴳⴰ ⵢⴰⵜ ⵜⵎⴳⵓⵔⵉ ⵜⴰⴷⵍⵙⴰⵏⵜ ⴷ ⵉⴳⴰ ⵢⴰⵏ ⵓⵙⴰⴳⵓⵎ ⵏ ⵓⴱⵓⵖⵍⵓ ⴰⵎⵓⵔⴰⵏ.
ⵉⵜⵜⵡⴰⵙⴽⴰⵔ ⴳ ⵓⵏⵎⵓⵇⵇⴰⵔ ⴰⴷ ⵏⵏⴰ ⴳ ⵍⵍⴰⵏ ⵉⵎⵙⵏⵓⴱⵛⵏ ⴷ ⵉⴽⴰⴷⵉⵎⵉⵢⵏ ⴷ ⵡⵉⵏⵏⴰ ⵉⵙⵡⵓⵔⵉⵏ ⵅⴼ ⵓⵎⵣⵔⵓⵢ ⴷ ⵡⴰⵢⴷⴰ, ⴰⵙⵙⵏⴽⴷ ⵏ ⵜⴽⵛⵛⵓⵎⵉⵏ ⴷ ⵉⵙⴼⵙⴰⵔⵏ ⵏⵏⴰ ⵉⵙⴰⵡⴰⵍⵏ ⵅⴼ ⵜⵓⴳⵜⵜ ⵏ ⵉⵙⵏⵜⴰⵍ ⴰⵎ "ⴰⵎⴷⵔⴰⵡ ⴰⵎⴰⵣⵉⵖ ⴷ ⵓⴷⴰⵢ ⴷ ⵢⵉⴼⴼⵓⵙ ⵏ ⵍⵎⵖⵔⵉⴱ, ⵉⵎⴷⵢⴰⵜⵏ ⴷ ⵜⵎⵏⵜⴰⵍ", ⴷ " ⴰⵎⵔⴰⵔⴰ ⴰⵖⵔⵎⴰⵏ ⴳⵖ ⵓⵙⵖⴰⵏ ⴰⵎⵓⵙⵍⵎ ⴷ ⵓⴷⴰⵢ ⴳ ⵍⵎⵖⵔⵉⴱ", ⴷ "ⵉⴳⵔ ⵏ ⵡⴰⴷ ⵏⵓⵏ ⴰⵙⴰⵢⵔⵓⵔ ⵏ ⵜⵓⴷⴷⵓⵔⵜ ⵏ ⵓⴷⴰⵢⵏ ⴷ ⵡⵉⵢⴰⴹ ⴳ ⵓⵎⵣⵔⵓⵢ", ⴷ " ⵓⴷⴰⵢⵏ ⴷ ⵜⵎⵙⵙⴽⵯⵜⵉⵜ ⵜⴰⵎⵓⵔⴰⵏⵜ ⴳ ⵡⴰⴷ ⵏⵓⵏ : ⵉⵙⵉⵙⴼⵉⵡⵏ ⵙⴳ ⵡⴰⵔⵔⴰⵜⵏ ⵉⵎⵓⵔⴰⵏⵏ".
ⴳ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵎⴰⵙⵙ ⵛⵜⴰⵜⵓ ⴳ ⵢⴰⵏ ⵓⵎⵙⴰⵡⴰⵍ ⴰⵏⵖⵎⴰⵙ ⵉ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵢⵜ ⵏ ⵉⵏⵖⵎⵉⵙⵏ ⵎⴰⵙ ⴷ ⴰⵎⵔⴰⵔⴰ ⵊⴰⵔ ⵉⵎⴰⵣⵉⵖⵏ ⴷ ⵓⴷⴰⵢⵏ ⵉⴳⴰ ⴰⴷⵙⵍⴰⵏ ⴳ ⵉⴼⴼⵓⵙ ⵏ ⵍⵎⵖⵔⵉⴱ, ⵙⵍⴰⵡⴰⵏ ⴰⴽⴽⵯ ⴳ ⵜⵙⴱⴱⴰⴱⵜ ⵎⵉⵏⵣⵉ ⴽⴽⴰⵏⵜⵏ ⵛⵛⴰⵔⵏ ⵉⵜⵙⵏ ⵏ ⵜⵡⵓⵔⵉ ⴷ ⵜⵣⵣⵓⵍⴰⵏⵉⵏ ⴰⵎ ⵜⵉⴳⵏⵉ ⴷ ⵏⵏⵇⵇⵔⵜ ⵏⵏⴰ ⵉⵍⵍⴰⵏ ⴳ ⵉⴳⴰⴷⴰⵣⵏ ⵉⴳⵏⵙⴰⵏⵏ ⵏ ⵍⵎⵖⵔⵉⴱ ⴷ ⵜⴼⵔⵉⵇⵜ.
ⴳ ⵜⵙⴳⴰ ⵏⵏⵉⴹⵏ, ⵉⵙⴰⵡⵍ ⵎⴰⵙⵙ ⵍⵃⵙⵏ ⵜⵓⴽⴱⴷⴰⵔ ⴰⵎⵙⵏⵓⴱⴱⵛ ⵓⴷⴰⵢ ⴰⵎⵖⵔⵉⴱⵉ ⴳ ⵜⴽⵛⵛⵓⵎⵜ ⵏⵏⵙ ⵅⴼ ⵓⴷⵔⴰⵡ ⵓⴷⴰⵢ ⴰⵎⵖⵔⵉⴱⵉ ⴳ ⵡⴰⴷ ⵏⵏⵓⵏ ⴷ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵓⵎⵙⵙⵔⵡⴰⵙ ⴳ ⴽⵔⴰ ⵏ ⵜⵉⵎⵢⵓⵔⵉⵏ (ⵜⵉⵎⵖⵔⵉⵡⵉⵏ, ⵜⴰⵎⵜⵜⴰⵏⵜ...) ⵎⴰ ⴰⴷ ⵉⵍⵍⴰ ⴳ ⵜⴷⵔⴰⵡⵜ ⵏ ⵉⵎⵣⴷⴰⵖⵏ ⵉⵎⵓⵔⴰⵏⵏ ⵏ ⵓⴷⴰⵢⵏ ⵏ ⵉⴼⵔⴰⵏ ⵏ ⵡⴰⵟⵍⴰⵚ ⴰⵎⵥⵢⴰⵏ ⴳ ⵜⴼⵓⴳⵍⵉⵡⵉⵏ ⴷ ⵜⵎⵍⴷⵉⵡⵉⵏ ⵏ ⵓⴷⴰⵢⵏ, ⴰⵡⴷ ⵜⴰⵎⵏⴰⴹⵜ ⴰⴷ ⴳⵉⵙ ⵜⵓⴳⵜⵜ ⵏ ⵜⵎⴰⵜⴰⵔⵉⵏ ⵏ ⵓⴷⴰⵢⵏ ⵣⵓⵏⴷ ⵜⵉⵎⵣⴳⵉⴷⴰ ⵏⵏⴰ ⵉⵍⵍⴰⵏ ⵜⴰⵎⴰ ⵍⴽⴰⵏⵉⵙⴰ, ⵎⴰ ⴰⴷ ⴰⵔ ⴰⵖ ⵉⵎⵎⴰⵍ ⵜⵓⴷⴷⵓⵔⵜ ⴷ ⵙⵙⵓⵔⴼ ⴳⵔ ⵉⵎⴰⵣⵉⵖⵏ ⴷ ⵓⴷⴰⵢⵏ.
ⵎⴰⵙⵙ ⵎⵓⵃⵎⵎⴰⴷ ⴱⵓⵣⵏⴽⴰⴹ ⴰⵙⵍⵎⴰⴷ ⴳ ⵜⵙⴷⴰⵡⵉⵜ ⵏ ⵉⴱⵏ ⵣⵓⵀⵔ ⴳ ⵓⴳⴰⴷⵉⵔ ⵉⵙⴰⵡⵍ ⵅⴼ ⵜⵉⵔⵔⴰ ⵏ ⵓⵎⵣⵔⵓⵢ ⵅⴼ ⵓⴷⴰⵢⵏ ⴰⵡⴷ ⵜⴰⵢⴰⴼⵓⵜ ⴷ ⵜⵎⵉⵜⴰⵔ ⵏ ⵜⵉⵔⵔⴰ ⴰⴷ ⴷ ⵓⵙⴰⵜ ⵏⵏⵙ ⴳ ⵓⵎⵣⵔⵓⵢ, ⵉⵏⵏⴰ ⵎⴰⵙ ⴷ ⵜⵉⵔⵔⴰ ⴰⴷ ⵜⵥⵍⵉ ⵙ ⵢⴰⵜ ⵜⵉⵣⵉ ⴳ ⵓⵎⵣⵔⵓⵢ ⴳ ⵖⴰⵙ ⵅⴼ ⴽⵔⴰ ⵏ ⵜⵎⵏⵜⴰⵍ ⵏⵏⴰ ⵉⵣⴷⵉⵏ ⵙ ⵓⵣⵡⴰⴳ ⵏ ⵓⴷⴰⵢⵏ ⴷ ⵜⵣⴷⴰⵢⵉⵏ ⵏⵏⵙⵏ ⵜⵉⵏⴰⵎⵓⵏⵉⵏ.