"ⵉⵙⵏⵓⴱⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⵎⴰ ⵢⴰⴷ ⵉⵎⴰⵏⵏ ⴷ ⴱⴰⴱ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴰⵎⴽⴽⵓⵙⵓ ⵏ ⵜⴳⵍⴷⵉⵜ ⴰⴳⵍⴷⵓⵏ ⵎⵓⵍⴰⵢ ⵍⵃⴰⵙⴰⵏ, ⴰⵙⵙ ⵏ ⵓⵙⵉⵏⴰⵙ 22 ⴷⵓⵊⴰⵏⴱⵉⵔ 2020 ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⴳ ⵕⵕⴱⴰⵟ, ⵢⴰⵏ ⵓⴽⴰⴱⴰⵕ ⵍⵍⵉⵖ ⵍⵍⴰⵏ:
- ⵎⴰⵙⵙ ⵊⴰⵕⵉⴷ ⴽⵓⵛⵏⵔ, ⴰⵎⵛⵛⵉⵡⵕ ⴰⴷⵙⵍⴰⵏ ⵏ ⵓⵏⵙⵙⵉⵅⴼ ⵏ ⵎⵉⵔⵉⴽⴰⵏ
- ⵎⴰⵙⵙ ⵎⴰⵢⵉⵔ ⴱⵏ ⵛⴰⴱⴰⵟ, ⴰⵎⵛⵛⵉⵡⵕ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵏ ⵉⵚⵕⴰⵢⵉⵍ
- ⵎⴰⵙⵙ ⴰⴼⵕⴰⵎ ⵊⵓⵡⵉⵍ ⴱⵉⵔⴽⵓⴼⵉⵜⵣ, ⴰⵎⴰⵡⴰⵙ ⵉⵎⵥⵍⵉ ⵏ ⵓⵏⵙⵙⵉⵅⴼ ⵏ ⵎⵉⵔⵉⴽⴰⵏ, ⴷ ⵓⵙⵎⴷⵢⴰⵡ ⵉⵎⵥⵍⵉ ⵏ ⵉⵎⵀⴰⵡⴰⴹⵏ ⵉⴳⵔⴰⵖⵍⴰⵏⵉⵏ.
ⴰⵎⵎⴰⵙ ⵏ ⵓⵙⵏⵓⴱⴳ ⴰⴷ, ⵉⵎⵍⴰ ⴷⴰⵖ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙⵏⴼⵓ ⵏⵏⵙ ⵅⴼ ⵜⵉⵍⴽⴰⵎⵉⵏ ⵜⵉⵎⵣⵔⵓⵢⵉⵏ ⵏ ⵓⵎⵙⴰⵡⴰⵍ ⵍⵍⵉ ⵢⵙⴽⵔ ⴱⴰⴱ ⵏ ⵡⴰⴷⴷⵓⵔ, ⴰⵙⵙ ⵏ 10 ⴷⵓⵊⴰⵏⴱⵉⵔ 2020, ⴷ ⵓⵏⵙⵙⵉⵅⴼ ⵎⴰⵙⵙ ⴷⵓⵏⴰⵍⴹ ⵟⵕⴰⵎⴱ, ⴰⵏⵙⵙⵉⵅⴼ ⵏ ⵎⵉⵔⵉⴽⴰⵏ.
ⵜⴰⵙⴳⵓⵔⵉ ⵜⴰⵏⵙⵙⵉⵅⴼⵜ ⵉⵙⵙⵏ ⵙ ⵜⵎⵖⵔⴰⴱⵉⵜ ⵏ ⵚⵚⵃⵕⴰ, ⵓⵍⴰ ⵜⵡⵓⵔⵉⵡⵉⵏ ⵉⵜⵜⵓⵎⵍⴰⵏ ⴰⴼ ⴰⴷ ⴳⵔⴰⵡⵍⵏ ⵉⵎⵉⴽⴰⵏⵉⵣⵎⵏ ⵏ ⵓⵎⵢⴰⵡⴰⵙ ⴷ ⵉⵚⵕⴰⵢⵉⵍ, ⴳⴰⵏⵜ ⵜⵎⵔⵏⵉⵡⵉⵏ ⵉⵎⵇⵇⵓⵕⵏ ⵅⴼ ⵓⵙⴷⵓⵙ ⵏ ⵜⵏⴼⵔⵓⵜ ⴷ ⵓⵔⴳⴳⵯ ⴳ ⵜⵙⴳⴰ.
ⵜⵖⴰⵡⵙⵉⵡⵉⵏ ⴰⴷ ⴳⴳⵔⵏⵜ ⵉ ⵜⵎⵙⵙⵏⵜⵉⵜⵉⵏ ⵏ ⵡⴰⴹⵓ ⵜⵉⵚⵕⵢⵍⵉⵏ ⴰⴷ ⴰⵙⵙⵉⵏⵜ ⵉⴳⵎⴰⵎⵏ ⵏ ⵜⴳⵔⴰⵡⵜ ⵜⵓⴷⴰⵢⵜ ⵜⴰⵎⵖⵔⴰⴱⵉⵜ ⴷ ⵉⵎⴰⵍⵍⴰⵢⵏ ⵉⵚⵕⵢⵍⵉⵏ ⵙ ⵍⵎⵖⵔⵉⴱ, ⴷ ⴰⵙⴳⵔⴰⵡⵍ ⵏ ⵉⵡⴰⴹⵏ ⴷ ⵜⵓⵇⵇⵏⴰⵏ ⵜⵉⴷⵉⴱⵍⵓⵎⴰⵙⵉⵢⵏ ⴷ ⵜⵉⵎⴰⴷⴷⵓⴷⵉⵏ ⴷ ⵉⵚⵕⴰⵢⵉⵍ ⵙ ⵓⵙⵡⵉⵔ ⵍⵍⵉ ⵢⴰⵜⵏ ⵉⵄⴷⵍⵏ, ⵜⴰⵏⴽⵔⴰ ⵙ ⵓⵎⵢⴰⵡⴰⵙ ⴰⴷⵎⵙⴰⵏ ⴰⵙⵉⵏⵔⴰⵏ, ⴷ ⴰⵕⵥⵥⵓⵎ ⵏ ⵓⵙⵉⵔⴰ ⵏ ⵓⵣⴷⴷⴰⵢ ⴳ ⵕⵕⴱⴰⵟ ⴷ ⵜⴰⵍⵍ ⴰⴱⵉⴱ.
ⵉⵙⵙⵎⵖⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⵎⴰⵙⵙ ⴽⵓⵛⵏⵔ ⵅⴼ ⵜⵡⵓⵔⵉ ⵍⵍⵉ ⵢⵙⴽⵔ ⵙⴳ ⵓⵔⵣⴰⴼ ⵏⵏⵙ ⴳ ⵍⵎⵖⵔⵉⴱ ⴳ ⵎⴰⵢⵢⵓ 2018, ⵍⵍⵉ ⴷ ⵢⵉⵡⵉⵏ ⵜⵡⵓⵔⵉ ⵜⴰⵎⵣⵔⵓⵢⵜ ⴰⴷ ⵉⵄⴷⵍⵏ ⵉ ⵓⴳⵣⵣⵓⵎ ⴰⵏⴰⵎⵓⵔ ⵏ ⵍⵎⵖⵔⵉⴱ ⴷ ⵜⵏⴼⵔⵓⵜ ⴳ ⵜⵙⴳⴰ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ.
ⵍⵍⵉⵖ ⵉⵙⴰⵡⵍ ⴷ ⵎⴰⵙⵙ ⵎⴰⵢⵉⵔ, ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⵅⴼ ⵜⵓⵇⵇⵏⴰⵏ ⵜⵉⵅⴰⵜⴰⵔⵉⵏ ⵉⵍⵍⴰⵏ ⴷ ⵜⴳⵔⴰⵡⵜ ⵜⵓⴷⴰⵢⵜ ⵜⴰⵎⵖⵔⴰⴱⵉⵜ, ⵙⵍⴰⵡⴰⵏ ⴰⴽⴽⵯ ⵉⴳⵎⴰⵎⵏ ⵏⵏⵙ ⵢⵓⵎⵥⵏ ⵉⵏⵙⴰⵏ ⵏ ⵜⵎⵙⵜⴳⴳⴰⵔⵜ ⴳ ⵉⵚⵕⴰⵢⵉⵍ.
ⵉⴳⴰ ⵡⵙⵏⵓⴱⴱⴳ ⴰⴳⵍⴷⴰⵏ ⴰⵣⵎⵣⵣⵓ ⵏ ⵜⵍⴰⵡⵜ ⵎⴰⵙ ⴰⴽⴽⵯ ⵜⵖⵜⴰⵙⵉⵏ ⵉⵜⵜⵓⵎⵍⴰⵏ ⴰⵎⵎⴰⵙ ⵏ ⵓⵎⵙⵏⴰⵍⴰ ⴰⵜⵉⵍⵉⴼⵓⵏⵉ ⵏ ⴰⵙⵙ ⵏ 10 ⴷⵓⵊⴰⵏⴱⵉⵔ ⴳⵔ ⵓⴳⵍⵍⵉⴷ ⴷ ⵓⵏⵙⵙⵉⵅⴼ ⴹⵓⵏⴰⵍⴹ ⵟⵕⴰⵎⴱ ⵔⴰⴷ ⴽⵓⵍⵍⵓ ⵜⵜⵓⵙⴽⴰⵔⵏⵜ.
ⵉⵎⴰ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⵏⵏⴰⵢⵜ ⵓⵔ ⵉⴱⴷⴷⵍⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵅⴼ ⵜⵖⴰⵡⵙⴰ ⵜⴰⴼⴰⵍⴰⵚⵟⵉⵏⵉⵜ, ⵉⴱⵉⴷⴷⵏ ⵅⴼ ⵓⴼⵙⵙⴰⵢ ⵏ ⵙⵉⵏ ⵉⵡⴰⵏⴽⵏ, ⵉⴷⵔⴰⵏ ⵢⴰⵏ ⵜⴰⵎⴰ ⵏ ⵢⴰⵏ, ⴰⵎⵎⴰⵙ ⵏ ⵜⵏⴼⵔⵓⵜ, ⴷ ⵉⵎⵀⴰⵡⴰⴹⵏ ⴳⵔ ⵜⴼⵓⵍⵉⵏ ⵜⵉⵚⵕⴰⵢⵍⵉⵜ ⴷ ⵜⴼⴰⵍⴰⵚⵟⵉⵏⵉⵜ ⴰⵎ ⴰⵎⵎⴰⵙ ⵉⵥⴹⴰⵕⵏ ⴰⴷ ⵉⵙⵙⵍⴽⴰⵎ ⵙ ⵢⴰⵏ ⵓⴼⵙⵙⴰⵢ ⴰⵎⴰⵜⴰⵢ ⴷ ⵉⴳⴳⵯⵔⴰⵏ, ⴷ ⵜⵉⵔⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⵏⵙⵙⵉⵅⴼ ⵏ ⵓⴳⵔⴰⵡ ⵏ ⵍⵇⵓⴷⵙ, ⴰⴷ ⵉⵃⵟⵟⵓ ⵜⴰⵎⴰⵎⴰⴽⵜ ⵜⴰⵎⵓⵙⵍⵎⵜ ⵏ ⵜⵖⵔⵎⵜ ⴰⴷ.
ⴷⴼⴼⵉⵔ ⵏ ⵓⵙⵏⵉⴱⴱⴳ ⴰⴷ, ⵜⵜⵓⵙⴳⵎⴰⴹ ⵢⴰⵜ ⵜⵙⴳⵓⵔⵉ ⵉⵛⵛⴰⵔⵏ ⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵎⵉⵔⵉⴽⴰⵏ, ⴷ ⵓⵡⴰⵏⴽ ⵏ ⵉⵚⵕⴰⵢⵉⵍ, ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵙⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ, ⴷ ⵎⴰⵙⵙ ⵊⴰⵕⵉⴷ ⴽⵓⵛⵏⵔ, ⴷ ⵎⴰⵙⵙ ⵎⴰⵢⵉⵔ ⴱⵏ ⵛⴰⴱⴰⵟ.
ⵃⴰⴹⵕⵏ ⴳ ⵓⵙⵏⵓⴱⴳ ⴰⴷ, ⵎⴰⵙⵙ ⴰⴷⴰⵎ ⵙⵉⵜ ⴱⵓⵍⵕ, ⴰⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵏⵜⵉⵜ ⵜⴰⵥⵕⴼⴰⵏⵜ ⵏ ⵜⴳⵎⵉ ⵜⴰⴳⵔⴰⵖⵍⴰⵏⵜ ⵏ ⵎⵉⵔⵉⴽⴰⵏ, ⴷ ⵎⴰⵙⵙ ⴼⵓⴻⴰⴷ ⵄⵍⵉ ⵍⵀⵉⵎⵎⴰ, ⴰⵎⵛⵛⵉⵡⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴷ ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵏ ⵉⵣⴷⵖⵏ ⴳ ⴱⵕⵕⴰ."