ⵜⵏⵏⴰ ⵜⵎⴰⵡⵙⴰⵙⵜ ⴳ ⵢⴰⵏ ⵓⵙⵉⵡⴹ ⴰⵏⴰⵖⵎⴰⵙ ⵉⵥⵍⵉⵏ ⵙ ⵜⵎⵣⵉⵣⵣⵍⵜ ⴰⴷ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴷⴷⵓ ⵜⵎⴰⵜⴰⵔⵜ ⴰⵙⵙⵓⵟⴹ ⴰⴳⴰⵎⴰⵢ ⴰⵙⵙⵔⵏⵓ ⵏⵏⴰ ⵢⴰⴽⴽⴰⵏ ⵜⴰⴷⵓⵙⵉ ⵉ ⵡⴰⵣⵣⴰⵏ ⴳ ⵜⵎⵥⵉ ⴷ ⵜⵎⵖⵓⵔⵜ ⵏⵏⵙ ,ⴰⵡⵜⵜⴰⵙ ⵏⵏⵙ ⴰⴼⴰⴷ ⴰⴷ ⵜⵙⴷⵓⵙ ⵜⵉⵎⵖⴰⵔⵉⵏ ⴰⴷ ⵙⵙⵓⵟⵓⴹⵏⵜ ⴷ ⵜⵡⵡⵓⵔⵉ ⵏⵏⴰ ⵢⴰⴽⴽⴰ ⵉ ⵜⴷⵓⵙⵉ ⵙⴳ ⵢⴰⵜ ⵜⵣⵔⴰⵡⵜ ⵜⴰⵎⴰⵙⵙⴰⵏⵜ, ⵜⵉⵏⵉ ⵎⴰⵙⴷ ⵉⵛⴰⵔⵔⴰⵏ ⵏⵏⴰ ⵉⵙⵙⵓⵟⵓⴹⵏ ⵙⴳ ⵙⴷⵉⵚ ⵢⵉⵔⵏ ⴷⴼⴼⵉⵔ ⵏ ⵜⵍⴰⵍⵉⵜ ⵏⵏⵙⵏ ⴰⵔ ⴷⴰⵔⵙ ⵜⵜⵉⵍⵉ ⵜⴷⵓⵙⵉ ⵙⴳ ⵜⵎⵥⵉ ⵏⵏⵙⵏ ⴰⵔ ⴽⵉⵖ ⵎⵇⵇⵓⵔⵏ .
ⴰⵙⵙⵓⵟⴹ ⴰⴳⴰⵎⴰⵢ ⵓⵔ ⴰⵔ ⵉⵜⵜⴼⵔⴰⴳ ⵖⴰⵙ ⵜⴰⴷⵓⵙⵉ ⵏ ⵡⴰⵣⵣⴰⵏ, ⵎⴰⵛⴰⵏ ⵜⵉⵏ ⵎⴰⵙ ⵏ ⵡⴰⵣⵣⴰⵏ ⴷ ⵜⵎⵖⴰⵔⵜ, ⵍⵍⵉⵖ ⴰⵔ ⵜⵜ ⵜⵙⵙⵏⵊⴰⵎ ⵙⴳ ⴽⵉⴳⴰⵏ ⵏ ⵜⵎⵓⴹⴰⵏ ⵣⵓⵏⴷ ⴰⵅⵏⵣⵉⵔ ⵏ ⵉⴼⴼ ⴷ ⵙⵙⴽⴽⵯⴰⵕ ⴷ ⵜⵎⵓⴹⴰⵏ ⵏ ⵡⵓⵍ .
ⴰⴼⴰⴷ ⴰⴷ ⵢⵉⵍⵉ ⵓⴹⴼⵓⵕ ⵏ ⵜⵎⵣⵉⵣⵣⵍⵜ ⴰⴷ ⵏⵏⴰ ⵉⵡⴰⵍⴰⵏ ⵉ ⵡⴰⵀⵉⵍ ⴰⵏⴰⵎⵓⵔ ⵏ ⵓⵙⴰⴷⵓⵔ ⴷ ⵓⵍⴽⴰⵎ ⵏ ⵉⵡⵜⵜⴰⵙⵏ ⵏ ⵓⵖⵓⴷⵓ, ⵜⵙⴽⵔ ⵜⵏⵖⵍⴰⴼⵜ ⵏ ⵜⴷⵓⵙⵉ ⵏ ⵡⴰⵔⴰⵢ ⴰⵏⴰⵎⵓⵏ ⴷ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵜⴰⵏⴼⴳⴰⵏⵜ ⴽⵉⴳⴰⵏ ⵏ ⵉⵙⵏⴰⵍⵏ ⵏ ⵓⵎⵢⴰⵡⴰⴹ,ⵎⴽⵍⵍⵉ ⵍⵍⴰⵏ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⵏ ⵓⵙⴼⵔⴽ ⵉ ⵉⵡⵡⵓⵔⴰⵏⵏ ⵏ ⵜⴷⵓⵙⵉ ⴳ ⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ .
ⵙⴳ ⵜⵎⴰⴳⵔⴰⵡⵜ ⵏ ⵜⴷⵓⵙⵉ ⵜⴰⵎⴰⴹⵍⴰⵏⵜ,ⵉⵣⴰⵢⴷ ⵓⵙⵉⵡⴹ ⵉⵏⵏⴰ ⵎⴰⵙ ⵜⵍⵍⴰ ⵜⵣⴷⴰⵢⵜ ⵉⴷⵓⵙⵏ ⴳ ⵎⴰⴷ ⵉⵣⵍⵉⵏ ⵙ ⵓⵣⵎⵎⵉⵎ ⵏ ⵡⴰⴷⴷⴰⴷⵏ ⵉⴳⵔⴰⵖⵍⴰⵏⵏ ⴷ ⵓⵙⵜⴰⵍ ⵏ ⵜⴼⵔⵙⵉ ⴷ ⵜⵎⵉⵖⵉⵙⵜ ⴷ ⵓⵙⴽⴽⵉⵔ ⵏ ⵜⵢⴰⴼⵓⵜ ⵜⴰⵏⵎⵍⴰⵏⵜ .
ⵉⵙⵙⵖⵥⵏ ⵓⵙⴰⴳⵯⵎ ⴰⴷ ⵏⵉⵜ, ⵎⴰⵙⴷ ⴰⵙⵙⵓⵟⴹ ⴳ ⵜⵉⵣⵉ ⴳ ⵜⵙⵔⴰⴳⵉⵏ ⵜⵉⵎⵣⵡⵓⵔⴰ ⴷⴼⴼⵉⵔ ⵏ ⵜⵍⴰⵍⵉⵜ ⵓⵔ ⴰⵔ ⵜⵜⵓⵙⴽⴰⵔ ⴳ ⵓⵙⵡⵉⵔ ⴰⵏⴰⵎⵓⵔ ⴰⴱⵍⴰ ⵙ 42 ⴳ ⵜⵎⵉⴹⵉ ⵏ ⵉⵛⴰⵔⵔⴰⵏ ⵙⴳ ⵓⵙⵙⵉⴹⵏ ⴰⵏⴰⵎⵓⵔ ⴰⵎⴳⴳⴰⵔⵓ ⵏ ⵉⵎⵣⴷⴰⵖ ⴷ ⵜⴷⵓⵙⵉ ⵏ ⵜⵡⵊⴰ ⵏ ⵓⵙⴳⴳⵯⴰⵙ ⵏ 2018 .
ⵔⴰⴷ ⵉⵜⵜⵓⵙⴽⴰⵔ ⵓⵡⵜⵜⴰⵙ ⴰⵎⴰⴹⵍⴰⵏ ⴳ ⵓⵙⵏⵜⵉ ⵏ ⵓⵙⴳⴳⵯⴰⵙ ⵏ 2025 ⴰⴼⴰⴷ ⴰⴷ ⴰⵡⵉⵏ ⵎⴰⴷ ⵉⵜⵜⴳⴳⴰⵏ 50 ⴳ ⵜⵎⵉⴹⵉ ⵏ ⵉⵛⴰⵔⵔⴰⵏ ⴳ ⵓⵙⵓⵟⴹ ⴰⴳⴰⵎⴰⵢ ⴳ ⵙⴷⵉⵚ ⵢⵉⵔⵏ ⵉⵎⵣⵡⵓⵔⴰ, ⴷ 50 ⴳ ⵜⵎⵉⴹⵉ ⵏ ⵜⵡⵜⵎⵉⵏ ⵏⵏⴰ ⵉⵙⵙⵓⵟⵓⴹⵏ ⵜⴰⵔⵡⴰ ⵏⵏⵙⵏ ⵙ ⵉⴼⴼ ⴳ ⵓⵣⴳⵏ ⵏ ⵜⵙⵔⴰⴳⵜ ⵜⴰⵎⵣⵡⴰⵔⵓⵜ ⴷⴼⴼⵉⵔ ⵏ ⵜⵍⴰⵍⵉⵜ .