Published on MAPNews (https://www.mapnews.ma/am)

Accueil > ⴰⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ .. ⴰⴼⵙⴰⵔ ⵏ ⵜⵡⵉⵙⵉ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵉⴳⵔ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ

ⴰⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ .. ⴰⴼⵙⴰⵔ ⵏ ⵜⵡⵉⵙⵉ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵉⴳⵔ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ

09 ⵢⵓⵏⵢⵓ 2022 Version Imprimable
ⵕⵕⴱⴰⵟ - ⵜⵜⵓⵙⵏⵎⴰⵍⴰ ⴳ ⵓⵙⵙⴰⵏ ⵣⵔⵉⵏⵉⵏ ⴳ ⵜⵖⵔⵎⵜ ⵏ ⵕⵕⴱⴰⵟ ⵢⴰⵜ ⵜⵉⵏⴰⵡⵜ ⵜⴰⴷⵍⵙⴰⵏⵜ ⵙⴳ ⴷⴰⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⴰⵜⵉ ⵏ ⵜⵙⵙⵓⵜⵍⵜ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵔⵉⴳⵜ ⴷ ⵓⴷⵍⵉⵙ ⴳ ⵜⵙⵙⵓⵜⵍⵜ ⵏⵏⵙ ⵜⵉⵙⵙ 27 .

ⴰⵡⵜⵜⴰⵙ ⵏ ⵜⵉⵏⴰⵡⵜ ⴷⴷⵅ, ⵏⵏⴰ ⵅⴼ ⵉⵍⵍⴰ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵎⴰⵙⵙ ⵍⵃⵓⵙⴰⵢⵏ ⵍⵎⵓⵊⴰⵀⵉⴷ, ⴰⴷ ⵙⵙⵉⴷⵔⵏ ⵙⵙⴷⵓⵙⵏ ⵜⵉⵍⴰⵍ ⵏ ⵓⵙⵉⵏⴰⴳ ⵏⵏⴰ ⵉⴳⴰⵏ ⵢⴰⵏ ⵓⵎⴷⵔⴰⵡ ⴰⴷⵙⵍⴰⵏ ⴳ ⵉⴳⵔ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ, ⴷ ⵜⵡⵡⵓⵔⵉⵡⵉⵏ ⴰⴽⴽⵯ ⵏⵏⴰ ⴰⵙ ⵉⵜⵜⵓⴼⴽⴰⵏ ⴰⴼⴰⴷ ⴰⴷ ⵜⵙⴱⵓⵖⵍⵓ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ .

ⴳ ⵓⴼⵙⴰⵔ ⵏⵏⵙ ⴷⴷⵓ ⵓⵣⵡⵍ ⴰⵙⵎⵙⴰⵙⴰ ⵏ ⵜⵎⴰⵣⵉⵖⵜ, ⵉⵏⵏⴰ ⵎⴰⵙⵙ ⵍⵃⵓⵙⴰⵢⵏ ⴰⵎⵓⵥⴰⵢ, ⵎⴰⵙ ⵉⵍⵍⴰ ⵓⵙⵏⴼⴰⵕ ⵉⴷⵓⵙⵏ ⴳ ⵉⴳⵔ ⵏ ⵓⵙⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵉⵣⴷⵉⵏ ⴷ ⵓⵙⵏⵚⴱ ⴷ ⵡⴰⴷⴷⴰⴷ ⴰⴷⵙⵍⴰⵏ ⵏ ⵜⵎⴰⵣⵉⵖⵜ ⴳ ⵜⵎⵏⴹⴰⵡⵜ, ⵉⵙⵙⴽⵯⵜⵉ ⵎⴰⵙⴷ ⴰⵙⴳⵓⴷⵉ ⵏⵏⴰ ⵉⵙⴽⵔ ⵓⵙⵉⵏⴰⴳ ⵉⴳⴰ ⵢⴰⵏ ⵓⵖⴱⴰⵍⵓ ⴷ ⵓⵙⵙⵉⵣⴷⴳ ⵏ ⵜⵢⵙⵙⵏⴰ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ .

ⵉⵏⵏⴰ ⴰⵡⴷ ⵎⴰⵙⴷ ⵜⴰⵎⴰⵣⵉⵖⵜ ⵖⵉⵍⴰⴷ ⵜⵥⴹⴰⵕ ⴰⴷ ⵜⴰⴷⴼ ⵙ ⵜⵎⵔⵙⴰⵍ ⵜⵉⵏⴰⵎⵓⵏⵉⵏ ⵏ ⵜⵎⴰⵣⵉⵔⵜ ⵏⵏⵖ , ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴷⴰⵔⵙ ⴽⵉⴳⴰⵏ ⵏ ⵉⵙⵓⴳⴰⵎ ⵉⵏⴰⴼⴳⴰⵏⵏ ⵏⵏⴰ ⵔⴰⴷ ⵢⴰⵡⵙ ⴳ ⵉⴳⵔ ⴷⴷⵅ .

ⴳ ⵉⴳⵔ ⴰⴷ ⵏⵉⵜ,ⵉⵏⵏⴰ ⵎⴰⵙⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵔ ⵉⵜⵜⴰⵡⵙ ⵙ ⵜⵣⵎⵎⴰⵔ ⵏⵏⵙ ⴳ ⵉⴳⵔ ⵏ ⵓⵙⵓⵖⵍ ⵏ ⴽⵉⴳⴰⵏ ⵏ ⵉⴳⵔⴰⵏ ⵣⵓⵏⴷ ⵉⵏⵙⴰⵜⵏ ⵉⵍⵉⴽⵜⵕⵓⵏⵉⵏ, ⵉⵏⵏⴰ ⴰⵡⴷ ⵎⴰⵙⴷ ⵉⵇⵇⴰⵏ ⴼ ⴽⵉⴳⴰⵏ ⵏ ⵜⵎⵔⵙⴰⵍ ⴰⴷ ⴰⵙⵉⵏⵜ ⵜⵉⵔⵎⵉⵜ ⵏ ⵓⵙⵉⵏⴰⴳ ⴳ ⵉⴳⵔ ⴷⴷⵅ ⴷ ⵓⵙⵎⵓⵜⵜⴳ ⵏ ⵉⵡⵡⵓⵔⴰⵏⵏ ⴳ ⵉⴳⵔ ⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .

ⵉⵣⴰⵢⴷ ⵎⴰⵙⵙ ⴰⵎⵓⵥⴰⵢ,ⵎⴰⵙⴷ ⵉⵖ ⵏⵔⴰ ⴰⴷ ⵉⵎⵓⵔⵙ ⵉⴳⵔ ⴰⴷ , ⵉⵇⵇⴰⵏⴷ ⴰⴷ ⵜⵜⵓⴼⴽⴰⵏⵜ ⵜⵎⵍⴷⵉⵡⵉⵏ ⵏ ⵓⵙⵡⵡⵓⵔⵉ ⵉ ⵡⵉⵏⴰ ⴷ ⴷⴰⵔ ⵜⵓⵔⴰⴳⵉⵏ ⴷ ⵓⵎⴰⵚⵟⵕ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ,ⵎⴽⵍⵍⵉ ⵉⵙⵙⵉⵎⵖⵓⵔ ⵜⵉⵔⵎⵉⵜ ⵏ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵓⴳⵏⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵉⵔⵉⵎ ⵏ ⵓⵙⵡⵓⵔⵉ ⵏ ⵉⵎⵙⵙⵓⵖⵍⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⴷ ⵢⴰⵥⴹⵏ .

ⵉⵣⵎⵎⵉⵎ ⴳ ⵉⴳⵔ ⴷⴷⵅ, ⵎⴰⵙⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵡⵜⵜⴰⵙ ⵏⵏⵙ ⵙⴳ ⵜⵉⵏⴰⵡⵉⵏ ⴷⴷⵅ ⴰⴼⴰⴷ ⴰⴷ ⵉⵏⵏⵓⵕⵥⵎ ⵅⴼ ⵉⴳⵔⴰⵏ ⵢⴰⴹⵏⵉⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ .

ⴳ ⵜⴽⵛⵛⵓⵎⵜ ⵏⵏⵙ ⵅⴼ ⵓⵙⵏⵜⵍ ⵏ ⵓⵙⵙⵉⴷⴼ ⵏ ⵜⵎⴰⵣⵉⵖⵜ ⴳ ⵡⴰⵎⵎⴰⵙⵏ ⴷ ⵓⵙⵉⵏⴰⴳ ⴰⵎⴰⵜⴰⵢ ⴷ ⵜⵎⵔⵙⴰⵍ ⵜⵉⵏⴰⵎⵓⵏⵉⵏ ⵉⵏⵏⴰ ⵎⴰⵙⵙ ⵄⴱⴷⵓⵍⵍⴰⵀ ⴱⵓⵣⵏⴷⴰⴳ ⵎⴰⵙⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⵉⵡⵙ ⴽⵉⴳⴰⵏ ⵙⴳ ⴽⵉⴳⴰⵏ ⵏ ⵉⵙⴳⴳⵯⴰⵙⵏ ⴳ ⵉⴳⵔ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⴽⵉⴳⴰⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵏⵉⵏ ⴷ ⵉⵙⵉⵏⴰⴳⵏ ⵙⴳ ⴳⵉⵙⵏ ⴰⵙⵉⵏⴰⴳ ⴰⵎⴰⵜⴰⵢ ⵏ ⵜⵏⵖⵎⴰⵙⵜ ⴷ ⵓⵎⵢⴰⵡⴰⴹ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵎⵀⵍⴰ ⵜⴰⵔⴰⴽⴰⵍⵜ ⴷ ⵓⵙⵉⵏⴰⴳ ⴰⵎⴰⵜⴰⵢ ⵏ ⵓⵙⵏⵏⴱⴹⵉ, ⵉⵏⵏⴰ ⵎⴰⵙⴷ ⵉⵙⵓⴳⴰⵎ ⵉⵏⴰⴼⴳⴰⵏⵏ ⵏ ⵓⵙⵉⵏⴰⴳ ⴰⵔ ⵜⵜⴰⵡⵙⵏ ⵙ ⵜⵣⵎⵎⴰⵔ ⵏⵏⵙⵏ ⴳ ⵓⵙⵙⵍⵎⴷ ⴳ ⵜⵎⵔⵙⴰⵍ ⴷⴷⵅ ⵙⴳ ⵓⵙⴳⴳⵯⴰⵙ ⵏ 2017 .

ⴳ ⵓⵙⴰⵜⵉ ⵏ ⵜⵡⵉⵙⵉ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵀⵉⵍ ⴳⵉⵙ ⴽⵉⴳⴰⵏ ⵏ ⵜⵉⵏⴰⵡⵉⵏ ⵏⵏⴰ ⵜⵙⵏⵎⴰⵍⴰ ⴳ ⵜⵙⵙⵓⵜⵍⵜ ⵜⵉⵙⵙ 27 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⴰⵔ ⴰⵙⵙ ⵏ 12 ⵢⵓⵏⵢⵓ ⴰⴷ ⵏⵉⵜ .

Dernière modification : 09 ⵢⵓⵏⵢⵓ 2022
Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B4%B0%E2%B5%99%E2%B4%BC%E2%B5%99%E2%B5%94-%E2%B4%B0%E2%B4%B3%E2%B5%94%E2%B4%B0%E2%B5%96%E2%B5%8D%E2%B4%B0%E2%B5%8F-%E2%B5%8F-%E2%B5%9C%E2%B5%A5%E2%B5%95%E2%B5%89%E2%B4%B3%E2%B5%9C-%E2%B4%B7-%E2%B5%93%E2%B4%B7%E2%B5%8D%E2%B5%89%E2%B5%99-%E2%B4%B0%E2%B4%BC%E2%B5%99%E2%B4%B0%E2%B5%94-%E2%B5%8F-%E2%B5%9C%E2%B5%A1%E2%B5%89%E2%B5%99%E2%B5%89-%E2%B5%8F-%E2%B5%93%E2%B5%99%E2%B5%89%E2%B5%8F%E2%B4%B0%E2%B4%B3-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-%E2%B5%8F-%E2%B5%9C%E2%B5%93%E2%B5%99%E2%B5%99%E2%B5%8F%E2%B4%B0-%E2%B5%9C%E2%B4%B0%E2%B5%8E%E2%B4%B0%E2%B5%A3%E2%B5%89%E2%B5%96%E2%B5%9C-%E2%B4%B3