ⴳ ⵓⵙⴰⵜⵉ ⴷⵖ, ⵉⵥⴹⴰⵕ ⵓⵎⵉ ⵏ ⵃⵎⵎⵓ ⵓⵏⴰⵎⵉⵔ ⴰⴷ ⵉⴳ ⵣⵓⵏⴷ ⵢⴰⵜ ⵜⴰⴷⴷⵓⵔⵜ ⵉⵙⵙⴽⵛⴰⵎⵏ ⵙ ⵢⴰⵏ ⵓⵎⴰⴹⴰⵍ ⵉⵣⵔⵉⵏ ⵉⵡⵜⵜⵓⵏ ⵉⵎⴰⵜⵜⵉⵡⵏ, ⴷ ⴰⴷ ⵜⴰⵡⵉ ⵉⵏⵖⵎⵉⵙⵏ ⵅⴼ ⵜⴰⵎⴰⵅⵉⵔⵜ ⵍⵍⵉ ⵜⵃⴹⴰ ⵜⴷⵍⵙⴰ ⵜⵎⵖⵔⴰⴱⵉⵜ, ⵓⵍⴰ ⵜⵓⵇⵇⵏⵉⵏ ⵍⵍⵉ ⵢⵙⵎⴰⵏⵏ ⵉⵎⵖⵔⴰⴱⵉⵢⵏ ⴷ ⵜⵎⵉⵣⴰⵔ ⴷ ⵉⴳⴷⵓⴷⵏ ⵢⴰⴹⵏⵉⵏ.
ⵉⵔⵡⴰⵙ ⵓⵎⵉ ⵢⴰⴷ ⵎⵏⵏⴰⵡ ⵏ ⵓⵎⵉⵢⵏ ⵏ ⵍⵢⵓⵏⴰⵏ, ⵣⵓⵏⴷ ⵓⵎⵉ ⵏ "ⵓⵔⴼⵢⵓⵙ ⴷ ⵢⵓⵔⵉⴷⵉⵙ" ⵏⵖⴷ "ⵉⵕⵓⵚ ⴷ ⴱⵙⵉⵛⵉ". ⵙⵉⵏ ⵓⵎⵉⵢⵏ ⴰⴷ ⵔⵙⴰⵡⵏ ⵓⵎⵉ ⵏ ⵃⵎⵎⵓ ⵓⵏⴰⵎⵉⵔ ⴰⵛⴽⵓ ⵎⵍⴰⵏ ⵎⴰⵏⵉⴽ ⴰⴷ ⵉⵥⴹⴰⵕ ⵢⴰⵏ ⴰⴷ ⵉⵎⵎⴰⵖ ⵜⴳⴳⴰⵍⵉⵏ ⵏ ⵉⴳⵏⵡⴰⵏ ⴰⴼ ⴰⴷ ⵢⴰⴼ ⵜⴰⵢⵔⵉ ⵏⵏⵙ. ⴰⵎⵎⴰⵖ ⴰⴷ ⵉⵣⵔⵉ ⴰⵎⵎⴰⵙ ⵏ ⵢⴰⵏ ⵓⵙⴽⴽⵉⵏ ⵏ ⵓⵖⵍⵉ ⵙ ⵉⴳⵏⵡⴰⵏ ⵎⴰ ⵎⵓ ⵢⵙⵎ "ⴰⵏⴰⴱⴰⵙ".
ⵣⵓⵏⴷ ⵓⵎⵉ ⵢⴰⴷ, ⴱⵍⴰ ⵏ ⵓⵎⵏⴰⴷ ⴰⵏⴰⵥⵓⵕ ⵏⵏⵙ ⵉⵅⵜⴰⵔⴰⵏ, ⵉⵟⵟⴰⴼ ⵙⵓⵍ ⵢⴰⵏ ⵓⵎⵏⴰⴷ ⴰⵙⵜⵉⵜⵉⵇⵉ ⵉⵥⵍⵉⵏ ⵙ ⵓⵙⵏⴼⵍⵓ ⵏ ⵓⵙⵏⵓⴱⴳ ⵏⵏⵙ ⴷⴰⵔ ⵓⵎⵖⵔⵉ ⴷ ⵓⵎⵙⴼⵍⴷ. ⴳ ⵓⵙⵎⵔⵙ ⴰⴷ, ⵓⵔ ⵉⵎⴽⵉⵏ ⴰⴷ ⵉⵙⵙⵏ ⵢⴰⵏ ⵎⵏⵛⴽ ⵏ ⵉⵏⴰⵎⴽⵏ ⴰⴷ ⵉⵟⵟⴰⴼ ⵓⵎⵉ, ⴰⵛⴽⵓ ⴽⵔⴰ ⵢⴳⴰⵜⵜ ⵢⴰⵏ ⵉⵥⴹⴰⵕ ⴰⴷ ⵉⴼⴽ ⵉ ⵓⵎⵉ ⵢⴰⴷ ⴰⵏⴰⵎⴽ ⵍⵍⵉ ⵢⵔⴰ.
ⵉⵟⵟⴰⴼ ⵓⵎⵉ ⵏ ⵃⵎⵎⵓ ⵓⵏⴰⵎⵉⵔ ⵎⵏⵏⴰⵡ ⵏ ⵜⵡⵓⵔⵡⵉⵡⵉⵏ. ⵜⵏⵏⴰ ⵏⴰⵊⴰⵜ ⵏⵔⵙⵉ, ⵜⴰⵙⵍⵎⴰⴷⵜ ⴷ ⵜⵔⵣⵣⵓⵜ ⴳ ⵜⵙⴷⴰⵡⵉⵜ ⵏ ⵍⵃⴰⵙⴰⵏ ⵡⵉⵙⵙ ⵙⵉⵏ ⴳ ⴹⴹⴰⵕⴱⵉⴹⴰ, ⵎⴰⵙ ⵓⵎⵉ ⵢⴰⴷ ⵉⵥⴹⴰⵕ ⴰⴷ "ⵉⵙⵙⴼⵔⵓ ⵜⵓⵇⵇⵏⴰ ⵉⵍⵍⴰⵏ ⴷ ⵉⵎⵎⴰ ⴰⵎⵎ ⵜⴰⵏⴼⵓⵙⵜ ⵜⴰⵢⵓⵏⴰⵏⵉⵜ ⵏ "ⵓⴷⵉⴱ", ⵓⵍⴰ ⴰⴷ ⵉⵎⵍ ⵜⵉⵖⴰⵔⵉⵡⵉⵏ ⵜⵉⵏⴰⵎⵓⵏⵉⵏ ⵣⵓⵏⴷ ⵍⵄⴰⵀⴷ ⴷ ⴰⵡⴰⵍ ⵉⵖⵥⴰⵏⵏ, ⵓⵍⴰ ⴰⴷ ⵉⵙⵉⴳⴳⵍ ⵉⵙⵇⵙⵉⵏ ⵏ ⵜⵓⴷⵔⵜ ⵏ ⵓⵏⴼⴳⴰⵏ, ⴷ ⴰⴷ ⵉⵙⴰⵇⵙⴰ ⵅⴼ ⵜⵓⵇⵇⵏⴰ ⵉⵙⵎⴰⵏⵏ ⴰⴽⴰⵍ ⴷ ⵜⵎⴳⵉⵜ, ⴷ ⴰⴷ ⵉⵎⵍ ⵓⴱⵔⵉⴷ ⵏ ⵓⵎⵓⵙⵙⴰ ⴰⴷⵍⵙⴰⵏ ⴰⵎⴰⵣⵉⵖ".
ⴰⵎⵎⴰⵙ ⵏ ⵢⴰⵏ ⵓⵎⵙⵏⴰⵍⴰ ⴷ ⵜⵙⵏⵓⵕⴰⵢⵜ ⵜⵎⵖⵔⴰⴱⵉⵜ ⵏ ⵜⵏⵖⵎⴰⵙⵜ (ⵍⴰⵎⴰⴱ), ⵜⵏⵏⴰ ⵎⴰⵙⵙⴰ ⵏⵔⵙⵉ ⵎⴰⵙ ⵓⵎⵉ ⵢⴰⴷ ⵉⵙⵙⵏ ⵎⵏⵏⴰⵡ ⵏ ⵜⵍⵙⵔⵉⵜⵉⵏ. ⵅⵜⵉⵏⵏ ⵍⵍⵉ ⴽⵓⵍⵍⵓ ⵢⵣⵡⴰⵔⵏ ⴳⴰⵏⵜⵏ ⵜⵉⵔⵔⴰⵜⵉⵏ ⵏ ⵉⵎⵙⵉⴳⴳⵉⵍⵏ ⴳ ⵜⵖⴰⵡⵙⵉⵡⵉⵏ ⵏ ⵜⵎⴰⵣⵉⵖⵜ (ⵙⵜⵓⵎ ⴳ 1895, ⵍⴰⵡⵓⵙⵜ ⴳ 1918, ⵊⵓⵙⵜⵉⵏⴰⵕ ⴳ 1925, ⵍⵓⴳⵉⵍ ⴳ 1949, ⵔⵓ ⴳ 1949), ⵜⴹⴼⴰⵕⵜⵏ ⵜⴰⵍⵙⴰⵔⵉⵜ ⵜⴰⵎⵖⵔⴰⴱⵉⵜ ⵏ ⴰⵎⵣⴰⵍ ⴳ 1968.
ⴷⴼⴼⵉⵔ ⵏ ⵖⵉⴽⴰⵏⵏ, ⵉⵣⵔⵉ ⵓⵎⵉ ⵢⴰⴷ ⵙ ⵜⵉⵔⵔⴰ ⵜⴰⵙⵜⵔⴰⵔⵜ (ⴱⵓⵕⴰⵚ ⴳ 1991, ⵄⴰⵚⵉⴷ ⴳ 1999), ⴷ ⵉⴽⵛⵎ ⵙ ⵜⵙⴽⵍⴰ (ⴰⵎⵎⴰⵙ ⵏ ⴽⵕⴰⴹ ⵉⵏⴳⴰⵍⵏ ⵏ ⵅⴰⵢⵔⴷⴷⵉⵏ), ⴷ ⵙ ⵜⵎⴷⵢⴰⵣⵜ, ⴷ ⵜⴰⵏⵇⵇⵉⵙⵜ ⵜⵓⴳⵣⵉⵍⵜ, ⴷ ⵓⵎⵣⴳⵓⵏ, ⴷ ⵙⵙⵉⵏⵉⵎⴰ, ⴷ ⵉⵏⴰⵡ ⴰⵙⵔⵜⴰⵏ ⴷ ⵜⴰⵙⵏⵉⵊⵊⵉⵜ ⵜⴰⵏⵢⵉⵎⴰⵏⵜ.
"ⴰⵃⵟⵟⵓ ⵏ ⵜⴹⴼⵕⵜ ⵜⴰⵎⵉⵡⴰⵏⵜ ⵉⵔⴰ ⵜⴷⵔⴰⵡⵜ ⵏ ⵜⴽⵏⵓⵍⵓⵊⵉⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵏⵖⵎⴰⵙⵜ ⴰⵎⵎⴰⵙ ⵏ ⵓⵃⵟⵟⵓ ⴷ ⵓⵙⵢⴰⴼⴰ ⴷ ⵓⵙⵓⴼⴼⵖ ⴷ ⵜⵉⵎⵃⴹⵉⵜ ⵏ ⵜⵏⵏⴰⵍⵉⵏ ⵉⵜⵜⵢⵓⵎⴰⵥⵏ ⵙ ⵜⵙⵎⵓⵏⵜ", ⵎⴰ ⵢⴰⴷ ⵜⵏⵏⴰ ⵎⴰⵙⵙⴰ ⵏⵔⵙⵉ.
ⵜⴰⵏⵏⴰⵢⵜ ⴰⴷ ⵉⵛⵛⴰⵔ ⵜ ⵕⴰⵛⵉⴷ ⴱⵓⵇⵙⵉⵎ, ⴰⵏⵎⵀⴰⵍ ⴰⵏⴰⵥⵓⵕ ⵏ ⵓⵏⵎⵓⴳⴳⴰⵔ ⴰⴳⵔⴰⵖⵍⴰⵏ "ⵉⵙⵏⵉ ⵏ ⵡⵓⵔⴳ" ⵏ ⵍⴼⵉⵍⵎ ⴰⵎⴰⵣⵉⵖ, ⵍⵍⵉ ⵢⴱⴷⴰⵏ ⵙⴳ ⵉⵢⵢⵉⵔⵏ ⵉⵣⵡⴰⵔⵏ ⵏ ⵓⵃⴹⵓ ⵅⴼ ⵓⴱⴰⵢⵢⵓⵕ ⴽⵓⴼⵉⴷ-19 ⵢⴰⵜ ⵜⵎⵀⵍⵜ ⵏ ⵓⵙⵙⴽⵛⵎ ⵏ ⵓⵎⵉ ⵏ ⵃⵎⵎⵓ ⵓⵏⴰⵎⵉⵔ ⴰⵎⵎⴰⵙ ⵏ ⵜⵉⵔⵉⵡⵜ ⵜⵉⵍⵉⴽⵟⵕⵓⵏⵉⵜ.
ⴼ ⵖⵉⴽⴰⵏⵏ, ⵉⵙⵜⴰ ⵎⴰⵙⵙ ⴱⵓⵇⵙⵉⵎ ⴰⴷ ⵉⴱⵉⴷⴷ ⵅⴼ ⵉⵥⵟⵟⴰⵏ ⵉⵏⴰⵎⵓⵏⵏ ⴰⴼ ⴰⴷ ⵉⵙⵙⵍⴽⵎ ⵓⵎⵉ ⵏ ⵃⵎⵎⵓ ⵓⵏⴰⵎⵉⵔ ⵙ ⵢⴰⵜ ⵜⴱⵔⵉⴷⵜ ⵢⵓⵙⵄⴰⵏ. ⴼ ⵖⵉⴽⴰⵏⵏ, ⵉⵏⵏⴰ ⵕⴰⵛⵉⴷ ⴱⵓⵇⵙⵉⵎ ⵓⵎⵉ ⵢⴰⴷ ⴰⵎⵎⴰⵙ ⵏ "ⴼⵉⵢⵙⴱⵓⴽ" ⴳ ⵢⴰⵏ ⵓⴼⵉⴷⵢⵓ ⵍⵍⵉ ⴳⵉⵜ ⵉⵙⵔⵙ, ⵎⴰ ⵢⴰⴷ ⵢⴰⵜ ⵢⵉⵡⵉⵏ ⵎⵏⵏⴰⵡ ⵏ ⵉⵙⵙⵔⵇⴱⵏ.
ⵉⵄⴷⵍ ⵓⵙⵎⵔⵙ ⵏ ⵜⵉⵜⵉⴽⵏⵓⵍⵓⵊⵉⵢⵏ ⵜⵉⵎⴰⵢⵏⵓⵏⵉⵏ ⵏ ⵜⵏⵖⵎⴰⵙⵜ ⴷ ⵏ ⵓⵎⵢⴰⵡⴰⴹ ⵉ ⵡⵃⵟⵟⵓ ⴷ ⵓⵙⵙⵍⴽⵎ ⵏ ⵜⵎⴽⴽⵓⵙⵜ ⵜⴰⵎⴰⵜⵜⵉⵡⵜ ⵜⵎⵖⵔⴰⴱⵉⵜ. ⵜⴼⵓⵍⴽⵉ ⵜⵡⵓⵔⵉ ⵢⴰⴷ ⵉ ⵓⵎⵉⵏ ⵉⵇⴱⵓⵕⵏ ⵣⵓⵏⴷ ⵡⵉⵏ ⵏ ⵃⵎⵎⵓ ⵓⵏⴰⵎⵉⵔ, ⵍⵍⵉ ⵢⴳⴰⵏ, ⵖⵉⴽ ⵍⵍⵉ ⵜⵏⵏⴰ ⵏⴰⵊⴰⵜ ⵏⵔⵙⵉ, "ⴰⵍⵍⴰⵙ ⴰⵎⵓⴼⴰⵢ ⵏ ⵓⴼⴰⵔⵙ ⵓⵎⴰⵔⵓⵔ ⵏ ⵓⵎⴽⴽⵓⵙ ⴰⴷⵍⵙⴰⵏ ⴰⵎⴰⵣⵉⵖ".